Numeri

Caput XXIX

  1. I

    Mensis etiam septimi prima dies venerabilis et sancta erit vobis. Omne opus servile non facietis in ea, quia dies clangoris est et tubarum.

  2. II

    Offeretisque holocaustum in odorem suavissimum Domino, vitulum de armento unum, arietem unum, et agnos anniculos immaculatos septem :

  3. III

    et in sacrificiis eorum, similæ oleo conspersæ tres decimas per singulos vitulos, duas decimas per arietem,

  4. IV

    unam decimam per agnum, qui simul sunt agni septem :

  5. V

    et hircum pro peccato, qui offertur in expiationem populi,

  6. VI

    præter holocaustum calendarum cum sacrificiis suis, et holocaustum sempiternum cum libationibus solitis : eisdem cæremoniis offeretis in odorem suavissimum incensum Domino.

  7. VII

    Decima quoque dies mensis hujus septimi erit vobis sancta atque venerabilis, et affligetis animas vestras : omne opus servile non facietis in ea.

  8. VIII

    Offeretisque holocaustum Domino in odorem suavissimum, vitulum de armento unum, arietem unum, agnos anniculos immaculatos septem :

  9. IX

    et in sacrificiis eorum similæ oleo conspersæ tres decimas per singulos vitulos, duas decimas per arietem,

  10. X

    decimam decimæ per agnos singulos, qui sunt simul agni septem :

  11. XI

    et hircum pro peccato, absque his quæ offerri pro delicto solent in expiationem, et holocaustum sempiternum, cum sacrificio et libaminibus eorum.

  12. XII

    Quintadecima vero die mensis septimi, quæ vobis sancta erit atque venerabilis, omne opus servile non facietis in ea, sed celebrabitis solemnitatem Domino septem diebus.

  13. XIII

    Offeretisque holocaustum in odorem suavissimum Domino, vitulos de armento tredecim, arietes duos, agnos anniculos immaculatos quatuordecim :

  14. XIV

    et in libamentis eorum, similæ oleo conspersæ tres decimas per vitulos singulos, qui sunt simul vituli tredecim, et duas decimas arieti uno, id est, simul arietibus duobus,

  15. XV

    et decimam decimæ agnis singulis, qui sunt simul agni quatuordecim :

  16. XVI

    et hircum pro peccato, absque holocausto sempiterno, et sacrificio, et libamine ejus.

  17. XVII

    In die altero offeretis vitulos de armento duodecim, arietes duos, agnos anniculos immaculatos quatuordecim :

  18. XVIII

    sacrificiaque et libamina singulorum, per vitulos, et arietes, et agnos rite celebrabitis :

  19. XIX

    et hircum pro peccato, absque holocausto sempiterno, sacrificioque et libamine ejus.

  20. XX

    Die tertio offeretis vitulos undecim, arietes duos, agnos anniculos immaculatos quatuordecim :

  21. XXI

    sacrificiaque et libamina singulorum, per vitulos, et arietes, et agnos rite celebrabitis :

  22. XXII

    et hircum pro peccato, absque holocausto sempiterno, sacrificioque et libamine ejus.

  23. XXIII

    Die quarto offeretis vitulos decem, arietes duos, agnos anniculos immaculatos quatuordecim :

  24. XXIV

    sacrificiaque et libamina singulorum, per vitulos, et arietes, et agnos rite celebrabitis :

  25. XXV

    et hircum pro peccato, absque holocausto sempiterno, sacrificioque ejus et libamine.

  26. XXVI

    Die quinto offeretis vitulos novem, arietes duos, agnos anniculos immaculatos quatuordecim :

  27. XXVII

    sacrificiaque et libamina singulorum, per vitulos, et arietes, et agnos rite celebrabitis :

  28. XXVIII

    et hircum pro peccato, absque holocausto sempiterno, sacrificioque ejus et libamine.

  29. XXIX

    Die sexto offeretis vitulos octo, arietes duos, agnos anniculos immaculatos quatuordecim :

  30. XXX

    sacrificiaque et libamina singulorum, per vitulos, et arietes, et agnos rite celebrabitis :

  31. XXXI

    et hircum pro peccato, absque holocausto sempiterno, sacrificioque ejus et libamine.

  32. XXXII

    Die septimo offeretis vitulos septem, et arietes duos, agnos anniculos immaculatos quatuordecim :

  33. XXXIII

    sacrificiaque et libamina singulorum, per vitulos, et arietes, et agnos rite celebrabitis :

  34. XXXIV

    et hircum pro peccato, absque holocausto sempiterno, sacrificioque ejus et libamine.

  35. XXXV

    Die octavo, qui est celeberrimus, omne opus servile non facietis,

  36. XXXVI

    offerentes holocaustum in odorem suavissimum Domino, vitulum unum, arietem unum, agnos anniculos immaculatos septem :

  37. XXXVII

    sacrificiaque et libamina singulorum, per vitulos, et arietes, et agnos rite celebrabitis :

  38. XXXVIII

    et hircum pro peccato, absque holocausto sempiterno, sacrificioque ejus et libamine.

  39. XXXIX

    Hæc offeretis Domino in solemnitatibus vestris : præter vota et oblationes spontaneas in holocausto, in sacrificio, in libamine, et in hostiis pacificis.