Numeri

Caput XXVIII

  1. I

    Dixit quoque Dominus ad Moysen :

  2. II

    Præcipe filiis Israël, et dices ad eos : Oblationem meam et panes, et incensum odoris suavissimi offerte per tempora sua.

  3. III

    Hæc sunt sacrificia quæ offerre debetis : agnos anniculos immaculatos duos quotidie in holocaustum sempiternum :

  4. IV

    unum offeretis mane, et alterum ad vesperum :

  5. V

    decimam partem ephi similæ, quæ conspersa sit oleo purissimo, et habeat quartam partem hin.

  6. VI

    Holocaustum juge est quod obtulistis in monte Sinai in odorem suavissimum incensi Domini.

  7. VII

    Et libabitis vini quartam partem hin per agnos singulos in sanctuario Domini.

  8. VIII

    Alterumque agnum similiter offeretis ad vesperam juxta omnem ritum sacrificii matutini, et libamentorum ejus, oblationem suavissimi odoris Domino.

  9. IX

    Die autem sabbati offeretis duos agnos anniculos immaculatos, et duas decimas similæ oleo conspersæ in sacrificio, et liba :

  10. X

    quæ rite funduntur per singula sabbata in holocaustum sempiternum.

  11. XI

    In calendis autem offeretis holocaustum Domino, vitulos de armento duos, arietem unum, agnos anniculos septem immaculatos,

  12. XII

    et tres decimas similæ oleo conspersæ in sacrificio per singulos vitulos : et duas decimas similæ oleo conspersæ per singulos arietes :

  13. XIII

    et decimam decimæ similæ ex oleo in sacrificio per agnos singulos : holocaustum suavissimi odoris atque incensi est Domino.

  14. XIV

    Libamenta autem vini, quæ per singulas fundenda sunt victimas, ista erunt : media pars hin per singulos vitulos, tertia per arietem, quarta per agnum. Hoc erit holocaustum per omnes menses, qui sibi anno vertente succedunt.

  15. XV

    Hircus quoque offeretur Domino pro peccatis in holocaustum sempiternum cum libamentis suis.

  16. XVI

    Mense autem primo, quartadecima die mensis, Phase Domini erit,

  17. XVII

    et quintadecima die solemnitas : septem diebus vescentur azymis.

  18. XVIII

    Quarum dies prima venerabilis et sancta erit : omne opus servile non facietis in ea.

  19. XIX

    Offeretisque incensum holocaustum Domino, vitulos de armento duos, arietem unum, agnos anniculos immaculatos septem :

  20. XX

    et sacrificia singulorum ex simila quæ conspersa sit oleo, tres decimas per singulos vitulos, et duas decimas per arietem,

  21. XXI

    et decimam decimæ per agnos singulos, id est, per septem agnos.

  22. XXII

    Et hircum pro peccato unum, ut expietur pro vobis,

  23. XXIII

    præter holocaustum matutinum, quod semper offeretis.

  24. XXIV

    Ita facietis per singulos dies septem dierum in fomitem ignis, et in odorem suavissimum Domino, qui surget de holocausto, et de libationibus singulorum.

  25. XXV

    Dies quoque septimus celeberrimus et sanctus erit vobis : omne opus servile non facietis in eo.

  26. XXVI

    Dies etiam primitivorum, quando offeretis novas fruges Domino, expletis hebdomadibus, venerabilis et sancta erit : omne opus servile non facietis in ea.

  27. XXVII

    Offeretisque holocaustum in odorem suavissimum Domino, vitulos de armento duos, arietem unum, et agnos anniculos immaculatos septem :

  28. XXVIII

    atque in sacrificiis eorum, similæ oleo conspersæ tres decimas per singulos vitulos, per arietes duas,

  29. XXIX

    per agnos decimam decimæ, qui simul sunt agni septem. Hircum quoque,

  30. XXX

    qui mactatur pro expiatione : præter holocaustum sempiternum et liba ejus.

  31. XXXI

    Immaculata offeretis omnia cum libationibus suis.