Psalmorum

Psalmus XCVIII

  1. I

    Psalmus ipsi David. Dominus regnavit : irascantur populi ; qui sedet super cherubim : moveatur terra.

  2. II

    Dominus in Sion magnus, et excelsus super omnes populos.

  3. III

    Confiteantur nomini tuo magno, quoniam terribile et sanctum est,

  4. IV

    et honor regis judicium diligit. Tu parasti directiones ; judicium et justitiam in Jacob tu fecisti.

  5. V

    Exaltate Dominum Deum nostrum, et adorate scabellum pedum ejus, quoniam sanctum est.

  6. VI

    Moyses et Aaron in sacerdotibus ejus, et Samuel inter eos qui invocant nomen ejus : invocabant Dominum, et ipse exaudiebat eos ;

  7. VII

    in columna nubis loquebatur ad eos. Custodiebant testimonia ejus, et præceptum quod dedit illis.

  8. VIII

    Domine Deus noster, tu exaudiebas eos ; Deus, tu propitius fuisti eis, et ulciscens in omnes adinventiones eorum.

  9. IX

    Exaltate Dominum Deum nostrum, et adorate in monte sancto ejus, quoniam sanctus Dominus Deus noster.