Psalmorum

Psalmus XCVII

  1. I

    Psalmus ipsi David. Cantate Domino canticum novum, quia mirabilia fecit. Salvavit sibi dextera ejus, et brachium sanctum ejus.

  2. II

    Notum fecit Dominus salutare suum ; in conspectu gentium revelavit justitiam suam.

  3. III

    Recordatus est misericordiæ suæ, et veritatis suæ domui Israël. Viderunt omnes termini terræ salutare Dei nostri.

  4. IV

    Jubilate Deo, omnis terra ; cantate, et exsultate, et psallite.

  5. V

    Psallite Domino in cithara ; in cithara et voce psalmi ;

  6. VI

    in tubis ductilibus, et voce tubæ corneæ. Jubilate in conspectu regis Domini :

  7. VII

    moveatur mare, et plenitudo ejus ; orbis terrarum, et qui habitant in eo.

  8. VIII

    Flumina plaudent manu ; simul montes exsultabunt

  9. IX

    a conspectu Domini : quoniam venit judicare terram. Judicabit orbem terrarum in justitia, et populos in æquitate.