Psalmorum

Psalmus LXXXI

  1. I

    Psalmus Asaph. Deus stetit in synagoga deorum ; in medio autem deos dijudicat.

  2. II

    Usquequo judicatis iniquitatem, et facies peccatorum sumitis ?

  3. III

    Judicate egeno et pupillo ; humilem et pauperem justificate.

  4. IV

    Eripite pauperem, et egenum de manu peccatoris liberate.

  5. V

    Nescierunt, neque intellexerunt ; in tenebris ambulant : movebuntur omnia fundamenta terræ.

  6. VI

    Ego dixi : Dii estis, et filii Excelsi omnes.

  7. VII

    Vos autem sicut homines moriemini, et sicut unus de principibus cadetis.

  8. VIII

    Surge, Deus, judica terram, quoniam tu hæreditabis in omnibus gentibus.