Psalmorum

Psalmus LXXX

  1. I

    In finem, pro torcularibus. Psalmus ipsi Asaph.

  2. II

    Exsultate Deo adjutori nostro ; jubilate Deo Jacob.

  3. III

    Sumite psalmum, et date tympanum ; psalterium jucundum cum cithara.

  4. IV

    Buccinate in neomenia tuba, in insigni die solemnitatis vestræ :

  5. V

    quia præceptum in Israël est, et judicium Deo Jacob.

  6. VI

    Testimonium in Joseph posuit illud, cum exiret de terra Ægypti ; linguam quam non noverat, audivit.

  7. VII

    Divertit ab oneribus dorsum ejus ; manus ejus in cophino servierunt.

  8. VIII

    In tribulatione invocasti me, et liberavi te. Exaudivi te in abscondito tempestatis ; probavi te apud aquam contradictionis.

  9. IX

    Audi, populus meus, et contestabor te. Israël, si audieris me,

  10. X

    non erit in te deus recens, neque adorabis deum alienum.

  11. XI

    Ego enim sum Dominus Deus tuus, qui eduxi te de terra Ægypti. Dilata os tuum, et implebo illud.

  12. XII

    Et non audivit populus meus vocem meam, et Israël non intendit mihi.

  13. XIII

    Et dimisi eos secundum desideria cordis eorum ; ibunt in adinventionibus suis.

  14. XIV

    Si populus meus audisset me, Israël si in viis meis ambulasset,

  15. XV

    pro nihilo forsitan inimicos eorum humiliassem, et super tribulantes eos misissem manum meam.

  16. XVI

    Inimici Domini mentiti sunt ei, et erit tempus eorum in sæcula.

  17. XVII

    Et cibavit eos ex adipe frumenti, et de petra melle saturavit eos.