Psalmorum

Psalmus LXXXII

  1. I

    Canticum Psalmi Asaph.

  2. II

    Deus, quis similis erit tibi ? ne taceas, neque compescaris, Deus :

  3. III

    quoniam ecce inimici tui sonuerunt, et qui oderunt te extulerunt caput.

  4. IV

    Super populum tuum malignaverunt consilium, et cogitaverunt adversus sanctos tuos.

  5. V

    Dixerunt : Venite, et disperdamus eos de gente, et non memoretur nomen Israël ultra.

  6. VI

    Quoniam cogitaverunt unanimiter ; simul adversum te testamentum disposuerunt :

  7. VII

    tabernacula Idumæorum et Ismahelitæ, Moab et Agareni,

  8. VIII

    Gebal, et Ammon, et Amalec ; alienigenæ cum habitantibus Tyrum.

  9. IX

    Etenim Assur venit cum illis : facti sunt in adjutorium filiis Lot.

  10. X

    Fac illis sicut Madian et Sisaræ, sicut Jabin in torrente Cisson.

  11. XI

    Disperierunt in Endor ; facti sunt ut stercus terræ.

  12. XII

    Pone principes eorum sicut Oreb, et Zeb, et Zebee, et Salmana : omnes principes eorum,

  13. XIII

    qui dixerunt : Hæreditate possideamus sanctuarium Dei.

  14. XIV

    Deus meus, pone illos ut rotam, et sicut stipulam ante faciem venti.

  15. XV

    Sicut ignis qui comburit silvam, et sicut flamma comburens montes,

  16. XVI

    ita persequeris illos in tempestate tua, et in ira tua turbabis eos.

  17. XVII

    Imple facies eorum ignominia, et quærent nomen tuum, Domine.

  18. XVIII

    Erubescant, et conturbentur in sæculum sæculi, et confundantur, et pereant.

  19. XIX

    Et cognoscant quia nomen tibi Dominus : tu solus Altissimus in omni terra.