Psalmorum

Psalmus CXLIX

  1. I

    Alleluja. Cantate Domino canticum novum ; laus ejus in ecclesia sanctorum.

  2. II

    Lætetur Israël in eo qui fecit eum, et filii Sion exsultent in rege suo.

  3. III

    Laudent nomen ejus in choro ; in tympano et psalterio psallant ei.

  4. IV

    Quia beneplacitum est Domino in populo suo, et exaltabit mansuetos in salutem.

  5. V

    Exsultabunt sancti in gloria ; lætabuntur in cubilibus suis.

  6. VI

    Exaltationes Dei in gutture eorum, et gladii ancipites in manibus eorum :

  7. VII

    ad faciendam vindictam in nationibus, increpationes in populis ;

  8. VIII

    ad alligandos reges eorum in compedibus, et nobiles eorum in manicis ferreis ;

  9. IX

    ut faciant in eis judicium conscriptum : gloria hæc est omnibus sanctis ejus. Alleluja.