Psalmorum

Psalmus CXLVIII

  1. I

    Alleluja. Laudate Dominum de cælis ; laudate eum in excelsis.

  2. II

    Laudate eum, omnes angeli ejus ; laudate eum, omnes virtutes ejus.

  3. III

    Laudate eum, sol et luna ; laudate eum, omnes stellæ et lumen.

  4. IV

    Laudate eum, cæli cælorum ; et aquæ omnes quæ super cælos sunt,

  5. V

    laudent nomen Domini. Quia ipse dixit, et facta sunt ; ipse mandavit, et creata sunt.

  6. VI

    Statuit ea in æternum, et in sæculum sæculi ; præceptum posuit, et non præteribit.

  7. VII

    Laudate Dominum de terra, dracones et omnes abyssi ;

  8. VIII

    ignis, grando, nix, glacies, spiritus procellarum, quæ faciunt verbum ejus ;

  9. IX

    montes, et omnes colles ; ligna fructifera, et omnes cedri ;

  10. X

    bestiæ, et universa pecora ; serpentes, et volucres pennatæ ;

  11. XI

    reges terræ et omnes populi ; principes et omnes judices terræ ;

  12. XII

    juvenes et virgines ; senes cum junioribus, laudent nomen Domini :

  13. XIII

    quia exaltatum est nomen ejus solius.

  14. XIV

    Confessio ejus super cælum et terram ; et exaltavit cornu populi sui. Hymnus omnibus sanctis ejus ; filiis Israël, populo appropinquanti sibi. Alleluja.