Psalmorum

Psalmus CXIII

  1. I

    Alleluja. In exitu Israël de Ægypto, domus Jacob de populo barbaro,

  2. II

    facta est Judæa sanctificatio ejus ; Israël potestas ejus.

  3. III

    Mare vidit, et fugit ; Jordanis conversus est retrorsum.

  4. IV

    Montes exsultaverunt ut arietes, et colles sicut agni ovium.

  5. V

    Quid est tibi, mare, quod fugisti ? et tu, Jordanis, quia conversus es retrorsum ?

  6. VI

    montes, exsultastis sicut arietes ? et colles, sicut agni ovium ?

  7. VII

    A facie Domini mota est terra, a facie Dei Jacob :

  8. VIII

    qui convertit petram in stagna aquarum, et rupem in fontes aquarum.

  9. IX

    Non nobis, Domine, non nobis, sed nomini tuo da gloriam :

  10. X

    super misericordia tua et veritate tua ; nequando dicant gentes : Ubi est Deus eorum ?

  11. XI

    Deus autem noster in cælo ; omnia quæcumque voluit fecit.

  12. XII

    Simulacra gentium argentum et aurum, opera manuum hominum.

  13. XIII

    Os habent, et non loquentur ; oculos habent, et non videbunt.

  14. XIV

    Aures habent, et non audient ; nares habent, et non odorabunt.

  15. XV

    Manus habent, et non palpabunt ; pedes habent, et non ambulabunt ; non clamabunt in gutture suo.

  16. XVI

    Similes illis fiant qui faciunt ea, et omnes qui confidunt in eis.

  17. XVII

    Domus Israël speravit in Domino ; adjutor eorum et protector eorum est.

  18. XVIII

    Domus Aaron speravit in Domino ; adjutor eorum et protector eorum est.

  19. XIX

    Qui timent Dominum speraverunt in Domino ; adjutor eorum et protector eorum est.

  20. XX

    Dominus memor fuit nostri, et benedixit nobis. Benedixit domui Israël ; benedixit domui Aaron.

  21. XXI

    Benedixit omnibus qui timent Dominum, pusillis cum majoribus.

  22. XXII

    Adjiciat Dominus super vos, super vos et super filios vestros.

  23. XXIII

    Benedicti vos a Domino, qui fecit cælum et terram.

  24. XXIV

    Cælum cæli Domino ; terram autem dedit filiis hominum.

  25. XXV

    Non mortui laudabunt te, Domine, neque omnes qui descendunt in infernum :

  26. XXVI

    sed nos qui vivimus, benedicimus Domino, ex hoc nunc et usque in sæculum.