Proverbiorum

Caput XXII

  1. I

    Melius est nomen bonum quam divitiæ multæ ; super argentum et aurum gratia bona.

  2. II

    Dives et pauper obviaverunt sibi : utriusque operator est Dominus.

  3. III

    Callidus vidit malum, et abscondit se ; innocens pertransiit, et afflictus est damno.

  4. IV

    Finis modestiæ timor Domini, divitiæ, et gloria, et vita.

  5. V

    Arma et gladii in via perversi ; custos autem animæ suæ longe recedit ab eis.

  6. VI

    Proverbium est : adolescens juxta viam suam ; etiam cum senuerit, non recedet ab ea.

  7. VII

    Dives pauperibus imperat, et qui accipit mutuum servus est fœnerantis.

  8. VIII

    Qui seminat iniquitatem metet mala, et virga iræ suæ consummabitur.

  9. IX

    Qui pronus est ad misericordiam benedicetur : de panibus enim suis dedit pauperi. Victoriam et honorem acquiret qui dat munera ; animam autem aufert accipientium.

  10. X

    Ejice derisorem, et exibit cum eo jurgium, cessabuntque causæ et contumeliæ.

  11. XI

    Qui diligit cordis munditiam, propter gratiam labiorum suorum habebit amicum regem.

  12. XII

    Oculi Domini custodiunt scientiam, et supplantantur verba iniqui.

  13. XIII

    Dicit piger : Leo est foris ; in medio platearum occidendus sum.

  14. XIV

    Fovea profunda os alienæ : cui iratus est Dominus, incidet in eam.

  15. XV

    Stultitia colligata est in corde pueri, et virga disciplinæ fugabit eam.

  16. XVI

    Qui calumniatur pauperem ut augeat divitias suas, dabit ipse ditiori, et egebit.

  17. XVII

    Inclina aurem tuam, et audi verba sapientium : appone autem cor ad doctrinam meam,

  18. XVIII

    quæ pulchra erit tibi cum servaveris eam in ventre tuo, et redundabit in labiis tuis :

  19. XIX

    ut sit in Domino fiducia tua, unde et ostendi eam tibi hodie.

  20. XX

    Ecce descripsi eam tibi tripliciter, in cogitationibus et scientia :

  21. XXI

    ut ostenderem tibi firmitatem et eloquia veritatis, respondere ex his illis qui miserunt te.

  22. XXII

    Non facias violentiam pauperi quia pauper est, neque conteras egenum in porta :

  23. XXIII

    quia judicabit Dominus causam ejus, et configet eos qui confixerunt animam ejus.

  24. XXIV

    Noli esse amicus homini iracundo, neque ambules cum viro furioso :

  25. XXV

    ne forte discas semitas ejus, et sumas scandalum animæ tuæ.

  26. XXVI

    Noli esse cum his qui defigunt manus suas, et qui vades se offerunt pro debitis :

  27. XXVII

    si enim non habes unde restituas, quid causæ est ut tollat operimentum de cubili tuo ?

  28. XXVIII

    Ne transgrediaris terminos antiquos, quos posuerunt patres tui.

  29. XXIX

    Vidisti virum velocem in opere suo ? coram regibus stabit, nec erit ante ignobiles.