Proverbiorum

Caput XXI

  1. I

    Sicut divisiones aquarum, ita cor regis in manu Domini : quocumque voluerit, inclinabit illud.

  2. II

    Omnis via viri recta sibi videtur : appendit autem corda Dominus.

  3. III

    Facere misericordiam et judicium magis placet Domino quam victimæ.

  4. IV

    Exaltatio oculorum est dilatatio cordis ; lucerna impiorum peccatum.

  5. V

    Cogitationes robusti semper in abundantia ; omnis autem piger semper in egestate est.

  6. VI

    Qui congregat thesauros lingua mendacii vanus et excors est, et impingetur ad laqueos mortis.

  7. VII

    Rapinæ impiorum detrahent eos, quia noluerunt facere judicium.

  8. VIII

    Perversa via viri aliena est ; qui autem mundus est, rectum opus ejus.

  9. IX

    Melius est sedere in angulo domatis, quam cum muliere litigiosa, et in domo communi.

  10. X

    Anima impii desiderat malum : non miserebitur proximo suo.

  11. XI

    Mulctato pestilente, sapientior erit parvulus, et si sectetur sapientem, sumet scientiam.

  12. XII

    Excogitat justus de domo impii, ut detrahat impios a malo.

  13. XIII

    Qui obturat aurem suam ad clamorem pauperis, et ipse clamabit, et non exaudietur.

  14. XIV

    Munus absconditum extinguit iras, et donum in sinu indignationem maximam.

  15. XV

    Gaudium justo est facere judicium, et pavor operantibus iniquitatem.

  16. XVI

    Vir qui erraverit a via doctrinæ in cœtu gigantum commorabitur.

  17. XVII

    Qui diligit epulas in egestate erit ; qui amat vinum et pinguia non ditabitur.

  18. XVIII

    Pro justo datur impius, et pro rectis iniquus.

  19. XIX

    Melius est habitare in terra deserta quam cum muliere rixosa et iracunda.

  20. XX

    Thesaurus desiderabilis, et oleum in habitaculo justi : et imprudens homo dissipabit illud.

  21. XXI

    Qui sequitur justitiam et misericordiam inveniet vitam, justitiam, et gloriam.

  22. XXII

    Civitatem fortium ascendit sapiens, et destruxit robur fiduciæ ejus.

  23. XXIII

    Qui custodit os suum et linguam suam custodit ab angustiis animam suam.

  24. XXIV

    Superbus et arrogans vocatur indoctus, qui in ira operatur superbiam.

  25. XXV

    Desideria occidunt pigrum : noluerunt enim quidquam manus ejus operari.

  26. XXVI

    Tota die concupiscit et desiderat ; qui autem justus est, tribuet, et non cessabit.

  27. XXVII

    Hostiæ impiorum abominabiles, quia offeruntur ex scelere.

  28. XXVIII

    Testis mendax peribit ; vir obediens loquetur victoriam.

  29. XXIX

    Vir impius procaciter obfirmat vultum suum ; qui autem rectus est corrigit viam suam.

  30. XXX

    Non est sapientia, non est prudentia, non est consilium contra Dominum.

  31. XXXI

    Equus paratur ad diem belli ; Dominus autem salutem tribuit.