Proverbiorum

Caput XIX

  1. I

    Melior est pauper qui ambulat in simplicitate sua quam dives torquens labia sua, et insipiens.

  2. II

    Ubi non est scientia animæ, non est bonum, et qui festinus est pedibus offendet.

  3. III

    Stultitia hominis supplantat gressus ejus, et contra Deum fervet animo suo.

  4. IV

    Divitiæ addunt amicos plurimos ; a paupere autem et hi quos habuit separantur.

  5. V

    Testis falsus non erit impunitus, et qui mendacia loquitur non effugiet.

  6. VI

    Multi colunt personam potentis, et amici sunt dona tribuentis.

  7. VII

    Fratres hominis pauperis oderunt eum ; insuper et amici procul recesserunt ab eo. Qui tantum verba sectatur nihil habebit ;

  8. VIII

    qui autem possessor est mentis diligit animam suam, et custos prudentiæ inveniet bona.

  9. IX

    Falsus testis non erit impunitus, et qui loquitur mendacia peribit.

  10. X

    Non decent stultum deliciæ, nec servum dominari principibus.

  11. XI

    Doctrina viri per patientiam noscitur, et gloria ejus est iniqua prætergredi.

  12. XII

    Sicut fremitus leonis, ita et regis ira, et sicut ros super herbam, ita et hilaritas ejus.

  13. XIII

    Dolor patris filius stultus, et tecta jugiter perstillantia litigiosa mulier.

  14. XIV

    Domus et divitiæ dantur a parentibus ; a Domino autem proprie uxor prudens.

  15. XV

    Pigredo immittit soporem, et anima dissoluta esuriet.

  16. XVI

    Qui custodit mandatum custodit animam suam ; qui autem negligit viam suam mortificabitur.

  17. XVII

    Fœneratur Domino qui miseretur pauperis, et vicissitudinem suam reddet ei.

  18. XVIII

    Erudi filium tuum ; ne desperes : ad interfectionem autem ejus ne ponas animam tuam.

  19. XIX

    Qui impatiens est sustinebit damnum, et cum rapuerit, aliud apponet.

  20. XX

    Audi consilium, et suscipe disciplinam, ut sis sapiens in novissimis tuis.

  21. XXI

    Multæ cogitationes in corde viri ; voluntas autem Domini permanebit.

  22. XXII

    Homo indigens misericors est, et melior est pauper quam vir mendax.

  23. XXIII

    Timor Domini ad vitam, et in plenitudine commorabitur absque visitatione pessima.

  24. XXIV

    Abscondit piger manum suam sub ascella, nec ad os suum applicat eam.

  25. XXV

    Pestilente flagellato stultus sapientior erit ; si autem corripueris sapientem, intelliget disciplinam.

  26. XXVI

    Qui affligit patrem, et fugat matrem, ignominiosus est et infelix.

  27. XXVII

    Non cesses, fili, audire doctrinam, nec ignores sermones scientiæ.

  28. XXVIII

    Testis iniquus deridet judicium, et os impiorum devorat iniquitatem.

  29. XXIX

    Parata sunt derisoribus judicia, et mallei percutientes stultorum corporibus.