Numeri

Caput XVII

  1. I

    Et locutus est Dominus ad Moysen, dicens :

  2. II

    Loquere ad filios Israël, et accipe ab eis virgas singulas per cognationes suas, a cunctis principibus tribuum, virgas duodecim, et uniuscujusque nomen superscribes virgæ suæ.

  3. III

    Nomen autem Aaron erit in tribu Levi, et una virga cunctas seorsum familias continebit :

  4. IV

    ponesque eas in tabernaculo fœderis coram testimonio, ubi loquar ad te.

  5. V

    Quem ex his elegero, germinabit virga ejus : et cohibebo a me querimonias filiorum Israël, quibus contra vos murmurant.

  6. VI

    Locutusque est Moyses ad filios Israël : et dederunt ei omnes principes virgas per singulas tribus : fueruntque virgæ duodecim absque virga Aaron.

  7. VII

    Quas cum posuisset Moyses coram Domino in tabernaculo testimonii,

  8. VIII

    sequenti die regressus invenit germinasse virgam Aaron in domo Levi : et turgentibus gemmis eruperant flores, qui, foliis dilatatis, in amygdalas deformati sunt.

  9. IX

    Protulit ergo Moyses omnes virgas de conspectu Domini ad cunctos filios Israël : videruntque, et receperunt singuli virgas suas.

  10. X

    Dixitque Dominus ad Moysen : Refer virgam Aaron in tabernaculum testimonii, ut servetur ibi in signum rebellium filiorum Israël, et quiescant querelæ eorum a me, ne moriantur.

  11. XI

    Fecitque Moyses sicut præceperat Dominus.

  12. XII

    Dixerunt autem filii Israël ad Moysen : Ecce consumpti sumus, omnes perivimus.

  13. XIII

    Quicumque accedit ad tabernaculum Domini, moritur. Num usque ad internecionem cuncti delendi sumus ?