Leviticus

Caput XV

  1. I

    Locutusque est Dominus ad Moysen et Aaron, dicens :

  2. II

    Loquimini filiis Israël, et dicite eis : Vir, qui patitur fluxum seminis, immundus erit.

  3. III

    Et tunc judicabitur huic vitio subjacere, cum per singula momenta adhæserit carni ejus, atque concreverit fœdus humor.

  4. IV

    Omne stratum, in quo dormierit, immundum erit, et ubicumque sederit.

  5. V

    Si quis hominum tetigerit lectum ejus, lavabit vestimenta sua, et ipse lotus aqua, immundus erit usque ad vesperum.

  6. VI

    Si sederit ubi ille sederat, et ipse lavabit vestimenta sua : et lotus aqua, immundus erit usque ad vesperum.

  7. VII

    Qui tetigerit carnem ejus, lavabit vestimenta sua : et ipse lotus aqua, immundus erit usque ad vesperum.

  8. VIII

    Si salivam hujuscemodi homo jecerit super eum qui mundus est, lavabit vestimenta sua : et lotus aqua, immundus erit usque ad vesperum.

  9. IX

    Sagma, super quo sederit, immundum erit :

  10. X

    et quidquid sub eo fuerit, qui fluxum seminis patitur, pollutum erit usque ad vesperum. Qui portaverit horum aliquid, lavabit vestimenta sua : et ipse lotus aqua, immundus erit usque ad vesperum.

  11. XI

    Omnis, quem tetigerit qui talis est, non lotis ante manibus, lavabit vestimenta sua, et lotus aqua, immundus erit usque ad vesperum.

  12. XII

    Vas fictile quod tetigerit confringetur : vas autem ligneum lavabitur aqua.

  13. XIII

    Si sanatus fuerit qui hujuscemodi sustinet passionem, numerabit septem dies post emundationem sui, et lotis vestibus et toto corpore in aquis viventibus, erit mundus.

  14. XIV

    Die autem octavo sumet duos turtures, aut duos pullos columbæ, et veniet in conspectum Domini ad ostium tabernaculi testimonii, dabitque eos sacerdoti :

  15. XV

    qui faciet unum pro peccato et alterum in holocaustum : rogabitque pro eo coram Domino, ut emundetur a fluxu seminis sui.

  16. XVI

    Vir de quo egreditur semen coitus, lavabit aqua omne corpus suum : et immundus erit usque ad vesperum.

  17. XVII

    Vestem et pellem, quam habuerit, lavabit aqua, et immunda erit usque ad vesperum.

  18. XVIII

    Mulier, cum qua coierit, lavabitur aqua, et immunda erit usque ad vesperum.

  19. XIX

    Mulier, quæ redeunte mense patitur fluxum sanguinis, septem diebus separabitur.

  20. XX

    Omnis qui tetigerit eam, immundus erit usque ad vesperum :

  21. XXI

    et in quo dormierit vel sederit diebus separationis suæ, polluetur.

  22. XXII

    Qui tetigerit lectum ejus, lavabit vestimenta sua : et ipse lotus aqua, immundus erit usque ad vesperum.

  23. XXIII

    Omne vas, super quo illa sederit, quisquis attigerit, lavabit vestimenta sua : et ipse lotus aqua, pollutus erit usque ad vesperum.

  24. XXIV

    Si coierit cum ea vir tempore sanguinis menstrualis, immundus erit septem diebus : et omne stratum, in quo dormierit, polluetur.

  25. XXV

    Mulier, quæ patitur multis diebus fluxum sanguinis non in tempore menstruali, vel quæ post menstruum sanguinem fluere non cessat, quamdiu subjacet huic passioni, immunda erit quasi sit in tempore menstruo.

  26. XXVI

    Omne stratum, in quo dormierit, et vas in quo sederit, pollutum erit.

  27. XXVII

    Quicumque tetigerit ea, lavabit vestimenta sua : et ipse lotus aqua, immundus erit usque ad vesperam.

  28. XXVIII

    Si steterit sanguis, et fluere cessaverit, numerabit septem dies purificationis suæ :

  29. XXIX

    et die octavo offeret pro se sacerdoti duos turtures, aut duos pullos columbarum, ad ostium tabernaculi testimonii :

  30. XXX

    qui unum faciet pro peccato, et alterum in holocaustum, rogabitque pro ea coram Domino, et pro fluxu immunditiæ ejus.

  31. XXXI

    Docebitis ergo filios Israël ut caveant immunditiam, et non moriantur in sordibus suis, cum polluerint tabernaculum meum quod est inter eos.

  32. XXXII

    Ista est lex ejus, qui patitur fluxum seminis, et qui polluitur coitu,

  33. XXXIII

    et quæ menstruis temporibus separatur, vel quæ jugi fluit sanguine, et hominis qui dormierit cum ea.