Isaiæ

Caput XXVI

  1. I

    In die illa cantabitur canticum istud in terra Juda : Urbs fortitudinis nostræ Sion ; salvator ponetur in ea murus et antemurale.

  2. II

    Aperite portas, et ingrediatur gens justa, custodiens veritatem.

  3. III

    Vetus error abiit : servabis pacem ; pacem, quia in te speravimus.

  4. IV

    Sperastis in Domino in sæculis æternis ; in Domino Deo forti in perpetuum.

  5. V

    Quia incurvabit habitantes in excelso ; civitatem sublimem humiliabit : humiliabit eam usque ad terram, detrahet eam usque ad pulverem.

  6. VI

    Conculcabit eam pes, pedes pauperis, gressus egenorum.

  7. VII

    Semita justi recta est, rectus callis justi ad ambulandum.

  8. VIII

    Et in semita judiciorum tuorum, Domine, sustinuimus te : nomen tuum et memoriale tuum in desiderio animæ.

  9. IX

    Anima mea desideravit te in nocte, sed et spiritu meo in præcordiis meis de mane vigilabo ad te. Cum feceris judicia tua in terra, justitiam discent habitatores orbis.

  10. X

    Misereamur impio, et non discet justitiam ; in terra sanctorum iniqua gessit, et non videbit gloriam Domini.

  11. XI

    Domine, exaltetur manus tua, et non videant ; videant, et confundantur zelantes populi ; et ignis hostes tuos devoret.

  12. XII

    Domine, dabis pacem nobis : omnia enim opera nostra operatus es nobis.

  13. XIII

    Domine Deus noster, possederunt nos domini absque te ; tantum in te recordemur nominis tui.

  14. XIV

    Morientes non vivant, gigantes non resurgant : propterea visitasti et contrivisti eos, et perdidisti omnem memoriam eorum.

  15. XV

    Indulsisti genti, Domine, indulsisti genti, numquid glorificatus es ? elongasti omnes terminos terræ.

  16. XVI

    Domine, in angustia requisierunt te, in tribulatione murmuris doctrina tua eis.

  17. XVII

    Sicut quæ concipit, cum appropinquaverit ad partum, dolens clamat in doloribus suis, sic facti sumus a facie tua, Domine.

  18. XVIII

    Concepimus, et quasi parturivimus, et peperimus spiritum. Salutes non fecimus in terra ; ideo non ceciderunt habitatores terræ.

  19. XIX

    Vivent mortui tui, interfecti mei resurgent. Expergiscimini, et laudate, qui habitatis in pulvere, quia ros lucis ros tuus, et terram gigantum detrahes in ruinam.

  20. XX

    Vade, populus meus, intra in cubicula tua ; claude ostia tua super te, abscondere modicum ad momentum, donec pertranseat indignatio.

  21. XXI

    Ecce enim Dominus egredietur de loco suo, ut visitet iniquitatem habitatoris terræ contra eum ; et revelabit terra sanguinem suum, et non operiet ultra interfectos suos.