Genesis

Caput XL

  1. I

    His ita gestis, accidit ut peccarent duo eunuchi, pincerna regis Ægypti, et pistor, domino suo.

  2. II

    Iratusque contra eos Pharao (nam alter pincernis præerat, alter pistoribus),

  3. III

    misit eos in carcerem principis militum, in quo erat vinctus et Joseph.

  4. IV

    At custos carceris tradidit eos Joseph, qui et ministrabat eis : aliquantulum temporis fluxerat, et illi in custodia tenebantur.

  5. V

    Videruntque ambo somnium nocte una, juxta interpretationem congruam sibi :

  6. VI

    ad quos cum introisset Joseph mane, et vidisset eos tristes,

  7. VII

    sciscitatus est eos, dicens : Cur tristior est hodie solito facies vestra ?

  8. VIII

    Qui responderunt : Somnium vidimus, et non est qui interpretetur nobis. Dixitque ad eos Joseph : Numquid non Dei est interpretatio ? referte mihi quid videritis.

  9. IX

    Narravit prior, præpositus pincernarum, somnium suum : Videbam coram me vitem,

  10. X

    in qua erant tres propagines, crescere paulatim in gemmas, et post flores uvas maturescere :

  11. XI

    calicemque Pharaonis in manu mea : tuli ergo uvas, et expressi in calicem quem tenebam, et tradidi poculum Pharaoni.

  12. XII

    Respondit Joseph : Hæc est interpretatio somnii : tres propagines, tres adhuc dies sunt :

  13. XIII

    post quos recordabitur Pharao ministerii tui, et restituet te in gradum pristinum : dabisque ei calicem juxta officium tuum, sicut ante facere consueveras.

  14. XIV

    Tantum memento mei, cum bene tibi fuerit, et facias mecum misericordiam : ut suggeras Pharaoni ut educat me de isto carcere :

  15. XV

    quia furto sublatus sum de terra Hebræorum, et hic innocens in lacum missus sum.

  16. XVI

    Videns pistorum magister quod prudenter somnium dissolvisset, ait : Et ego vidi somnium : quod tria canistra farinæ haberem super caput meum :

  17. XVII

    et in uno canistro quod erat excelsius, portare me omnes cibos qui fiunt arte pistoria, avesque comedere ex eo.

  18. XVIII

    Respondit Joseph : Hæc est interpretatio somnii : tria canistra, tres adhuc dies sunt :

  19. XIX

    post quos auferet Pharao caput tuum, ac suspendet te in cruce, et lacerabunt volucres carnes tuas.

  20. XX

    Exinde dies tertius natalitius Pharaonis erat : qui faciens grande convivium pueris suis, recordatus est inter epulas magistri pincernarum, et pistorum principis.

  21. XXI

    Restituitque alterum in locum suum, ut porrigeret ei poculum :

  22. XXII

    alterum suspendit in patibulo, ut conjectoris veritas probaretur.

  23. XXIII

    Et tamen succedentibus prosperis, præpositus pincernarum oblitus est interpretis sui.