Ecclesiasticus
Caput XLI
- I
O mors, quam amara est memoria tua homini pacem habenti in substantiis suis :
- II
viro quieto, et cujus viæ directæ sunt in omnibus, et adhuc valenti accipere cibum !
- III
O mors, bonum est judicium tuum homini indigenti, et qui minoratur viribus,
- IV
defecto ætate, et cui de omnibus cura est, et incredibili, qui perdit patientiam !
- V
Noli metuere judicium mortis : memento quæ ante te fuerunt, et quæ superventura sunt tibi : hoc judicium a Domino omni carni.
- VI
Et quid superveniet tibi in beneplacito Altissimi ? sive decem, sive centum, sive mille anni :
- VII
non est enim in inferno accusatio vitæ.
- VIII
Filii abominationum fiunt filii peccatorum, et qui conversantur secus domos impiorum.
- IX
Filiorum peccatorum periet hæreditas, et cum semine illorum assiduitas opprobrii.
- X
De patre impio queruntur filii, quoniam propter illum sunt in opprobrio.
- XI
Væ vobis, viri impii, qui dereliquistis legem Domini Altissimi !
- XII
Et si nati fueritis, in maledictione nascemini : et si mortui fueritis, in maledictione erit pars vestra.
- XIII
Omnia quæ de terra sunt in terram convertentur : sic impii a maledicto in perditionem.
- XIV
Luctus hominum in corpore ipsorum : nomen autem impiorum delebitur.
- XV
Curam habe de bono nomine : hoc enim magis permanebit tibi quam mille thesauri pretiosi et magni.
- XVI
Bonæ vitæ numerus dierum : bonum autem nomen permanebit in ævum.
- XVII
Disciplinam in pace conservate, filii : sapientia enim abscondita, et thesaurus invisus, quæ utilitas in utrisque ?
- XVIII
Melior est homo qui abscondit stultitiam suam, quam homo qui abscondit sapientiam suam.
- XIX
Verumtamen reveremini in his quæ procedunt de ore meo :
- XX
non est enim bonum omnem reverentiam observare, et non omnia omnibus bene placent in fide.
- XXI
Erubescite a patre et a matre de fornicatione : et a præsidente et a potente de mendacio :
- XXII
a principe et a judice de delicto : a synagoga et plebe de iniquitate :
- XXIII
a socio et amico de injustitia, et de loco in quo habitas :
- XXIV
de furto, de veritate Dei, et testamento : de discubitu in panibus, et ab obfuscatione dati et accepti :
- XXV
a salutantibus de silentio, a respectu mulieris fornicariæ, et ab aversione vultus cognati.
- XXVI
Ne avertas faciem a proximo tuo, et ab auferendo partem et non restituendo.
- XXVII
Ne respicias mulierem alieni viri, et ne scruteris ancillam ejus, neque steteris ad lectum ejus.
- XXVIII
Ab amicis de sermonibus improperii : et cum dederis, ne improperes.