Ecclesiasticus

Caput XXXV

  1. I

    Qui conservat legem multiplicat oblationem.

  2. II

    Sacrificium salutare est attendere mandatis, et discedere ab omni iniquitate.

  3. III

    Et propitiationem litare sacrificii super injustitias : et deprecatio pro peccatis, recedere ab injustitia.

  4. IV

    Retribuet gratiam qui offert similaginem : et qui facit misericordiam offert sacrificium.

  5. V

    Beneplacitum est Domino recedere ab iniquitate : et deprecatio pro peccatis recedere ab injustitia.

  6. VI

    Non apparebis ante conspectum Domini vacuus :

  7. VII

    hæc enim omnia propter mandatum Dei fiunt.

  8. VIII

    Oblatio justi impinguat altare, et odor suavitatis est in conspectu Altissimi.

  9. IX

    Sacrificium justi acceptum est, et memoriam ejus non obliviscetur Dominus.

  10. X

    Bono animo gloriam redde Deo, et non minuas primitias manuum tuarum.

  11. XI

    In omni dato hilarem fac vultum tuum, et in exsultatione sanctifica decimas tuas.

  12. XII

    Da Altissimo secundum datum ejus, et in bono oculo adinventionem facito manuum tuarum,

  13. XIII

    quoniam Dominus retribuens est, et septies tantum reddet tibi.

  14. XIV

    Noli offerre munera prava, non enim suscipiet illa.

  15. XV

    Et noli inspicere sacrificium injustum, quoniam Dominus judex est, et non est apud illum gloria personæ.

  16. XVI

    Non accipiet Dominus personam in pauperem, et deprecationem læsi exaudiet.

  17. XVII

    Non despiciet preces pupilli, nec viduam, si effundat loquelam gemitus.

  18. XVIII

    Nonne lacrimæ viduæ ad maxillam descendunt, et exclamatio ejus super deducentem eas ?

  19. XIX

    A maxilla enim ascendunt usque ad cælum, et Dominus exauditor non delectabitur in illis.

  20. XX

    Qui adorat Deum in oblectatione suscipietur, et deprecatio illius usque ad nubes propinquabit.

  21. XXI

    Oratio humiliantis se nubes penetrabit, et donec propinquet non consolabitur, et non discedet donec Altissimus aspiciat.

  22. XXII

    Et Dominus non elongabit : et judicabit justos, et faciet judicium : et Fortissimus non habebit in illis patientiam, ut contribulet dorsum ipsorum :

  23. XXIII

    et gentibus reddet vindictam, donec tollat plenitudinem superborum, et sceptra iniquorum contribulet :

  24. XXIV

    donec reddat hominibus secundum actus suos, et secundum opera Adæ, et secundum præsumptionem illius :

  25. XXV

    donec judicet judicium plebis suæ, et oblectabit justos misericordia sua.

  26. XXVI

    Speciosa misericordia Dei in tempore tribulationis, quasi nubes pluviæ in tempore siccitatis.