Ecclesiasticus

Caput XXVI

  1. I

    Mulieris bonæ beatus vir : numerus enim annorum illius duplex.

  2. II

    Mulier fortis oblectat virum suum, et annos vitæ illius in pace implebit.

  3. III

    Pars bona mulier bona, in parte timentium Deum dabitur viro pro factis bonis :

  4. IV

    divitis autem et pauperis cor bonum, in omni tempore vultus illorum hilaris.

  5. V

    A tribus timuit cor meum, et in quarto facies mea metuit :

  6. VI

    delaturam civitatis, et collectionem populi :

  7. VII

    calumniam mendacem super mortem omnia gravia :

  8. VIII

    dolor cordis et luctus, mulier zelotypa.

  9. IX

    In muliere zelotypa flagellum linguæ, omnibus communicans.

  10. X

    Sicut boum jugum quod movetur, ita et mulier nequam : qui tenet illam quasi qui apprehendit scorpionem.

  11. XI

    Mulier ebriosa ira magna, et contumelia : et turpitudo illius non tegetur.

  12. XII

    Fornicatio mulieris in extollentia oculorum, et in palpebris illius agnoscetur.

  13. XIII

    In filia non avertente se, firma custodiam, ne inventa occasione utatur se.

  14. XIV

    Ab omni irreverentia oculorum ejus cave, et ne mireris si te neglexerit.

  15. XV

    Sicut viator sitiens ad fontem os aperiet, et ab omni aqua proxima bibet, et contra omnem palum sedebit, et contra omnem sagittam aperiet pharetram donec deficiat.

  16. XVI

    Gratia mulieris sedulæ delectabit virum suum, et ossa illius impinguabit.

  17. XVII

    Disciplina illius datum Dei est.

  18. XVIII

    Mulier sensata et tacita, non est immutatio eruditæ animæ.

  19. XIX

    Gratia super gratiam mulier sancta et pudorata.

  20. XX

    Omnis autem ponderatio non est digna continentis animæ.

  21. XXI

    Sicut sol oriens mundo in altissimis Dei, sic mulieris bonæ species in ornamentum domus ejus.

  22. XXII

    Lucerna splendens super candelabrum sanctum, et species faciei super ætatem stabilem.

  23. XXIII

    Columnæ aureæ super bases argenteas, et pedes firmi super plantas stabilis mulieris.

  24. XXIV

    Fundamenta æterna supra petram solidam, et mandata Dei in corde mulieris sanctæ.

  25. XXV

    In duobus contristatum est cor meum, et in tertio iracundia mihi advenit :

  26. XXVI

    vir bellator deficiens per inopiam ; et vir sensatus contemptus ;

  27. XXVII

    et qui transgreditur a justitia ad peccatum : Deus paravit eum ad rhomphæam.

  28. XXVIII

    Duæ species difficiles et periculosæ mihi apparuerunt : difficile exuitur negotians a negligentia, et non justificabitur caupo a peccatis labiorum.