Psalmorum

Psalmus XCV

  1. I

    Canticum ipsi David, quando domus ædificabatur post captivitatem. Cantate Domino canticum novum ; cantate Domino omnis terra.

  2. II

    Cantate Domino, et benedicite nomini ejus ; annuntiate de die in diem salutare ejus.

  3. III

    Annuntiate inter gentes gloriam ejus ; in omnibus populis mirabilia ejus.

  4. IV

    Quoniam magnus Dominus, et laudabilis nimis : terribilis est super omnes deos.

  5. V

    Quoniam omnes dii gentium dæmonia ; Dominus autem cælos fecit.

  6. VI

    Confessio et pulchritudo in conspectu ejus ; sanctimonia et magnificentia in sanctificatione ejus.

  7. VII

    Afferte Domino, patriæ gentium, afferte Domino gloriam et honorem ;

  8. VIII

    afferte Domino gloriam nomini ejus. Tollite hostias, et introite in atria ejus ;

  9. IX

    adorate Dominum in atrio sancto ejus. Commoveatur a facie ejus universa terra ;

  10. X

    dicite in gentibus, quia Dominus regnavit. Etenim correxit orbem terræ, qui non commovebitur ; judicabit populos in æquitate.

  11. XI

    Lætentur cæli, et exsultet terra ; commoveatur mare et plenitudo ejus ;

  12. XII

    gaudebunt campi, et omnia quæ in eis sunt. Tunc exsultabunt omnia ligna silvarum

  13. XIII

    a facie Domini, quia venit, quoniam venit judicare terram. Judicabit orbem terræ in æquitate, et populos in veritate sua.