Psalmorum

Psalmus XCI

  1. I

    Psalmus cantici, in die sabbati.

  2. II

    Bonum est confiteri Domino, et psallere nomini tuo, Altissime :

  3. III

    ad annuntiandum mane misericordiam tuam, et veritatem tuam per noctem,

  4. IV

    in decachordo, psalterio ; cum cantico, in cithara.

  5. V

    Quia delectasti me, Domine, in factura tua ; et in operibus manuum tuarum exsultabo.

  6. VI

    Quam magnificata sunt opera tua, Domine ! nimis profundæ factæ sunt cogitationes tuæ.

  7. VII

    Vir insipiens non cognoscet, et stultus non intelliget hæc.

  8. VIII

    Cum exorti fuerint peccatores sicut fœnum, et apparuerint omnes qui operantur iniquitatem, ut intereant in sæculum sæculi :

  9. IX

    tu autem Altissimus in æternum, Domine.

  10. X

    Quoniam ecce inimici tui, Domine, quoniam ecce inimici tui peribunt ; et dispergentur omnes qui operantur iniquitatem.

  11. XI

    Et exaltabitur sicut unicornis cornu meum, et senectus mea in misericordia uberi.

  12. XII

    Et despexit oculus meus inimicos meos, et in insurgentibus in me malignantibus audiet auris mea.

  13. XIII

    Justus ut palma florebit ; sicut cedrus Libani multiplicabitur.

  14. XIV

    Plantati in domo Domini, in atriis domus Dei nostri florebunt.

  15. XV

    Adhuc multiplicabuntur in senecta uberi, et bene patientes erunt :

  16. XVI

    ut annuntient quoniam rectus Dominus Deus noster, et non est iniquitas in eo.