Psalmorum

Psalmus VIII

  1. I

    In finem, pro torcularibus. Psalmus David.

  2. II

    Domine, Dominus noster, quam admirabile est nomen tuum in universa terra ! quoniam elevata est magnificentia tua super cælos.

  3. III

    Ex ore infantium et lactentium perfecisti laudem propter inimicos tuos, ut destruas inimicum et ultorem.

  4. IV

    Quoniam videbo cælos tuos, opera digitorum tuorum, lunam et stellas quæ tu fundasti.

  5. V

    Quid est homo, quod memor es ejus ? aut filius hominis, quoniam visitas eum ?

  6. VI

    Minuisti eum paulominus ab angelis ; gloria et honore coronasti eum ;

  7. VII

    et constituisti eum super opera manuum tuarum.

  8. VIII

    Omnia subjecisti sub pedibus ejus, oves et boves universas, insuper et pecora campi,

  9. IX

    volucres cæli, et pisces maris qui perambulant semitas maris.

  10. X

    Domine, Dominus noster, quam admirabile est nomen tuum in universa terra !