Psalmorum

Psalmus LX

  1. I

    In finem. In hymnis David.

  2. II

    Exaudi, Deus, deprecationem meam ; intende orationi meæ.

  3. III

    A finibus terræ ad te clamavi, dum anxiaretur cor meum ; in petra exaltasti me. Deduxisti me,

  4. IV

    quia factus es spes mea : turris fortitudinis a facie inimici.

  5. V

    Inhabitabo in tabernaculo tuo in sæcula ; protegar in velamento alarum tuarum.

  6. VI

    Quoniam tu, Deus meus, exaudisti orationem meam ; dedisti hæreditatem timentibus nomen tuum.

  7. VII

    Dies super dies regis adjicies ; annos ejus usque in diem generationis et generationis.

  8. VIII

    Permanet in æternum in conspectu Dei : misericordiam et veritatem ejus quis requiret ?

  9. IX

    Sic psalmum dicam nomini tuo in sæculum sæculi, ut reddam vota mea de die in diem.