Psalmorum

Psalmus LVIII

  1. I

    In finem, ne disperdas. David in tituli inscriptionem, quando misit Saul et custodivit domum ejus ut eum interficeret.

  2. II

    Eripe me de inimicis meis, Deus meus, et ab insurgentibus in me libera me.

  3. III

    Eripe me de operantibus iniquitatem, et de viris sanguinum salva me.

  4. IV

    Quia ecce ceperunt animam meam ; irruerunt in me fortes.

  5. V

    Neque iniquitas mea, neque peccatum meum, Domine ; sine iniquitate cucurri, et direxi.

  6. VI

    Exsurge in occursum meum, et vide : et tu, Domine Deus virtutum, Deus Israël, intende ad visitandas omnes gentes : non miserearis omnibus qui operantur iniquitatem.

  7. VII

    Convertentur ad vesperam, et famem patientur ut canes : et circuibunt civitatem.

  8. VIII

    Ecce loquentur in ore suo, et gladius in labiis eorum : quoniam quis audivit ?

  9. IX

    Et tu, Domine, deridebis eos ; ad nihilum deduces omnes gentes.

  10. X

    Fortitudinem meam ad te custodiam, quia, Deus, susceptor meus es :

  11. XI

    Deus meus misericordia ejus præveniet me.

  12. XII

    Deus ostendet mihi super inimicos meos : ne occidas eos, nequando obliviscantur populi mei. Disperge illos in virtute tua, et depone eos, protector meus, Domine :

  13. XIII

    delictum oris eorum, sermonem labiorum ipsorum ; et comprehendantur in superbia sua. Et de execratione et mendacio annuntiabuntur

  14. XIV

    in consummatione : in ira consummationis, et non erunt. Et scient quia Deus dominabitur Jacob, et finium terræ.

  15. XV

    Convertentur ad vesperam, et famem patientur ut canes : et circuibunt civitatem.

  16. XVI

    Ipsi dispergentur ad manducandum ; si vero non fuerint saturati, et murmurabunt.

  17. XVII

    Ego autem cantabo fortitudinem tuam, et exsultabo mane misericordiam tuam : quia factus es susceptor meus, et refugium meum in die tribulationis meæ.

  18. XVIII

    Adjutor meus, tibi psallam, quia Deus susceptor meus es ; Deus meus, misericordia mea.