Psalmorum

Psalmus LVII

  1. I

    In finem, ne disperdas. David in tituli inscriptionem.

  2. II

    Si vere utique justitiam loquimini, recta judicate, filii hominum.

  3. III

    Etenim in corde iniquitates operamini ; in terra injustitias manus vestræ concinnant.

  4. IV

    Alienati sunt peccatores a vulva ; erraverunt ab utero : locuti sunt falsa.

  5. V

    Furor illis secundum similitudinem serpentis, sicut aspidis surdæ et obturantis aures suas,

  6. VI

    quæ non exaudiet vocem incantantium, et venefici incantantis sapienter.

  7. VII

    Deus conteret dentes eorum in ore ipsorum ; molas leonum confringet Dominus.

  8. VIII

    Ad nihilum devenient tamquam aqua decurrens ; intendit arcum suum donec infirmentur.

  9. IX

    Sicut cera quæ fluit auferentur ; supercecidit ignis, et non viderunt solem.

  10. X

    Priusquam intelligerent spinæ vestræ rhamnum, sicut viventes sic in ira absorbet eos.

  11. XI

    Lætabitur justus cum viderit vindictam ; manus suas lavabit in sanguine peccatoris.

  12. XII

    Et dicet homo : Si utique est fructus justo, utique est Deus judicans eos in terra.