Psalmorum

Psalmus XXIII

  1. I

    Prima sabbati. Psalmus David. Domini est terra, et plenitudo ejus ; orbis terrarum, et universi qui habitant in eo.

  2. II

    Quia ipse super maria fundavit eum, et super flumina præparavit eum.

  3. III

    Quis ascendet in montem Domini ? aut quis stabit in loco sancto ejus ?

  4. IV

    Innocens manibus et mundo corde, qui non accepit in vano animam suam, nec juravit in dolo proximo suo :

  5. V

    hic accipiet benedictionem a Domino, et misericordiam a Deo salutari suo.

  6. VI

    Hæc est generatio quærentium eum, quærentium faciem Dei Jacob.

  7. VII

    Attollite portas, principes, vestras, et elevamini, portæ æternales, et introibit rex gloriæ.

  8. VIII

    Quis est iste rex gloriæ ? Dominus fortis et potens, Dominus potens in prælio.

  9. IX

    Attollite portas, principes, vestras, et elevamini, portæ æternales, et introibit rex gloriæ.

  10. X

    Quis est iste rex gloriæ ? Dominus virtutum ipse est rex gloriæ.