Psalmorum

Psalmus II

  1. I

    Quare fremuerunt gentes, et populi meditati sunt inania ?

  2. II

    Astiterunt reges terræ, et principes convenerunt in unum adversus Dominum, et adversus christum ejus.

  3. III

    Dirumpamus vincula eorum, et projiciamus a nobis jugum ipsorum.

  4. IV

    Qui habitat in cælis irridebit eos, et Dominus subsannabit eos.

  5. V

    Tunc loquetur ad eos in ira sua, et in furore suo conturbabit eos.

  6. VI

    Ego autem constitutus sum rex ab eo super Sion, montem sanctum ejus, prædicans præceptum ejus.

  7. VII

    Dominus dixit ad me : Filius meus es tu ; ego hodie genui te.

  8. VIII

    Postula a me, et dabo tibi gentes hæreditatem tuam, et possessionem tuam terminos terræ.

  9. IX

    Reges eos in virga ferrea, et tamquam vas figuli confringes eos.

  10. X

    Et nunc, reges, intelligite ; erudimini, qui judicatis terram.

  11. XI

    Servite Domino in timore, et exsultate ei cum tremore.

  12. XII

    Apprehendite disciplinam, nequando irascatur Dominus, et pereatis de via justa.

  13. XIII

    Cum exarserit in brevi ira ejus, beati omnes qui confidunt in eo.