Psalmorum

Psalmus CXLI

  1. I

    Intellectus David, cum esset in spelunca, oratio.

  2. II

    Voce mea ad Dominum clamavi, voce mea ad Dominum deprecatus sum.

  3. III

    Effundo in conspectu ejus orationem meam, et tribulationem meam ante ipsum pronuntio :

  4. IV

    in deficiendo ex me spiritum meum, et tu cognovisti semitas meas. In via hac qua ambulabam absconderunt laqueum mihi.

  5. V

    Considerabam ad dexteram, et videbam, et non erat qui cognosceret me : periit fuga a me, et non est qui requirat animam meam.

  6. VI

    Clamavi ad te, Domine ; dixi : Tu es spes mea, portio mea in terra viventium.

  7. VII

    Intende ad deprecationem meam, quia humiliatus sum nimis. Libera me a persequentibus me, quia confortati sunt super me.

  8. VIII

    Educ de custodia animam meam ad confitendum nomini tuo ; me exspectant justi donec retribuas mihi.