Psalmorum

Psalmus CXXXV

  1. I

    Alleluja. Confitemini Domino, quoniam bonus, quoniam in æternum misericordia ejus.

  2. II

    Confitemini Deo deorum, quoniam in æternum misericordia ejus.

  3. III

    Confitemini Domino dominorum, quoniam in æternum misericordia ejus.

  4. IV

    Qui facit mirabilia magna solus, quoniam in æternum misericordia ejus.

  5. V

    Qui fecit cælos in intellectu, quoniam in æternum misericordia ejus.

  6. VI

    Qui firmavit terram super aquas, quoniam in æternum misericordia ejus.

  7. VII

    Qui fecit luminaria magna, quoniam in æternum misericordia ejus :

  8. VIII

    solem in potestatem diei, quoniam in æternum misericordia ejus ;

  9. IX

    lunam et stellas in potestatem noctis, quoniam in æternum misericordia ejus.

  10. X

    Qui percussit Ægyptum cum primogenitis eorum, quoniam in æternum misericordia ejus.

  11. XI

    Qui eduxit Israël de medio eorum, quoniam in æternum misericordia ejus,

  12. XII

    in manu potenti et brachio excelso, quoniam in æternum misericordia ejus.

  13. XIII

    Qui divisit mare Rubrum in divisiones, quoniam in æternum misericordia ejus ;

  14. XIV

    et eduxit Israël per medium ejus, quoniam in æternum misericordia ejus ;

  15. XV

    et excussit Pharaonem et virtutem ejus in mari Rubro, quoniam in æternum misericordia ejus.

  16. XVI

    Qui traduxit populum suum per desertum, quoniam in æternum misericordia ejus.

  17. XVII

    Qui percussit reges magnos, quoniam in æternum misericordia ejus ;

  18. XVIII

    et occidit reges fortes, quoniam in æternum misericordia ejus :

  19. XIX

    Sehon, regem Amorrhæorum, quoniam in æternum misericordia ejus ;

  20. XX

    et Og, regem Basan, quoniam in æternum misericordia ejus :

  21. XXI

    et dedit terram eorum hæreditatem, quoniam in æternum misericordia ejus ;

  22. XXII

    hæreditatem Israël, servo suo, quoniam in æternum misericordia ejus.

  23. XXIII

    Quia in humilitate nostra memor fuit nostri, quoniam in æternum misericordia ejus ;

  24. XXIV

    et redemit nos ab inimicis nostris, quoniam in æternum misericordia ejus.

  25. XXV

    Qui dat escam omni carni, quoniam in æternum misericordia ejus.

  26. XXVI

    Confitemini Deo cæli, quoniam in æternum misericordia ejus. Confitemini Domino dominorum, quoniam in æternum misericordia ejus.