Psalmorum

Psalmus CXI

  1. I

    Alleluja, reversionis Aggæi et Zachariæ. Beatus vir qui timet Dominum : in mandatis ejus volet nimis.

  2. II

    Potens in terra erit semen ejus ; generatio rectorum benedicetur.

  3. III

    Gloria et divitiæ in domo ejus, et justitia ejus manet in sæculum sæculi.

  4. IV

    Exortum est in tenebris lumen rectis : misericors, et miserator, et justus.

  5. V

    Jucundus homo qui miseretur et commodat ; disponet sermones suos in judicio :

  6. VI

    quia in æternum non commovebitur.

  7. VII

    In memoria æterna erit justus ; ab auditione mala non timebit. Paratum cor ejus sperare in Domino,

  8. VIII

    confirmatum est cor ejus ; non commovebitur donec despiciat inimicos suos.

  9. IX

    Dispersit, dedit pauperibus ; justitia ejus manet in sæculum sæculi : cornu ejus exaltabitur in gloria.

  10. X

    Peccator videbit, et irascetur ; dentibus suis fremet et tabescet : desiderium peccatorum peribit.