Psalmorum

Psalmus CII

  1. I

    Ipsi David. Benedic, anima mea, Domino, et omnia quæ intra me sunt nomini sancto ejus.

  2. II

    Benedic, anima mea, Domino, et noli oblivisci omnes retributiones ejus.

  3. III

    Qui propitiatur omnibus iniquitatibus tuis ; qui sanat omnes infirmitates tuas :

  4. IV

    qui redimit de interitu vitam tuam ; qui coronat te in misericordia et miserationibus :

  5. V

    qui replet in bonis desiderium tuum ; renovabitur ut aquilæ juventus tua :

  6. VI

    faciens misericordias Dominus, et judicium omnibus injuriam patientibus.

  7. VII

    Notas fecit vias suas Moysi ; filiis Israël voluntates suas.

  8. VIII

    Miserator et misericors Dominus : longanimis, et multum misericors.

  9. IX

    Non in perpetuum irascetur, neque in æternum comminabitur.

  10. X

    Non secundum peccata nostra fecit nobis, neque secundum iniquitates nostras retribuit nobis.

  11. XI

    Quoniam secundum altitudinem cæli a terra, corroboravit misericordiam suam super timentes se ;

  12. XII

    quantum distat ortus ab occidente, longe fecit a nobis iniquitates nostras.

  13. XIII

    Quomodo miseretur pater filiorum, misertus est Dominus timentibus se.

  14. XIV

    Quoniam ipse cognovit figmentum nostrum ; recordatus est quoniam pulvis sumus.

  15. XV

    Homo, sicut fœnum dies ejus ; tamquam flos agri, sic efflorebit :

  16. XVI

    quoniam spiritus pertransibit in illo, et non subsistet, et non cognoscet amplius locum suum.

  17. XVII

    Misericordia autem Domini ab æterno, et usque in æternum super timentes eum. Et justitia illius in filios filiorum,

  18. XVIII

    his qui servant testamentum ejus, et memores sunt mandatorum ipsius ad faciendum ea.

  19. XIX

    Dominus in cælo paravit sedem suam, et regnum ipsius omnibus dominabitur.

  20. XX

    Benedicite Domino, omnes angeli ejus : potentes virtute, facientes verbum illius, ad audiendam vocem sermonum ejus.

  21. XXI

    Benedicite Domino, omnes virtutes ejus ; ministri ejus, qui facitis voluntatem ejus.

  22. XXII

    Benedicite Domino, omnia opera ejus : in omni loco dominationis ejus, benedic, anima mea, Domino.