Proverbiorum

Caput XXXI

  1. I

    Verba Lamuelis regis. Visio qua erudivit eum mater sua.

  2. II

    Quid, dilecte mi ? quid, dilecte uteri mei ? quid, dilecte votorum meorum ?

  3. III

    Ne dederis mulieribus substantiam tuam, et divitias tuas ad delendos reges.

  4. IV

    Noli regibus, o Lamuel, noli regibus dare vinum, quia nullum secretum est ubi regnat ebrietas ;

  5. V

    et ne forte bibant, et obliviscantur judiciorum, et mutent causam filiorum pauperis.

  6. VI

    Date siceram mœrentibus, et vinum his qui amaro sunt animo.

  7. VII

    Bibant, et obliviscantur egestatis suæ, et doloris sui non recordentur amplius.

  8. VIII

    Aperi os tuum muto, et causis omnium filiorum qui pertranseunt.

  9. IX

    Aperi os tuum, decerne quod justum est, et judica inopem et pauperem.

  10. X

    Mulierem fortem quis inveniet ? procul et de ultimis finibus pretium ejus.

  11. XI

    Confidit in ea cor viri sui, et spoliis non indigebit.

  12. XII

    Reddet ei bonum, et non malum, omnibus diebus vitæ suæ.

  13. XIII

    Quæsivit lanam et linum, et operata est consilio manuum suarum.

  14. XIV

    Facta est quasi navis institoris, de longe portans panem suum.

  15. XV

    Et de nocte surrexit, deditque prædam domesticis suis, et cibaria ancillis suis.

  16. XVI

    Consideravit agrum, et emit eum ; de fructu manuum suarum plantavit vineam.

  17. XVII

    Accinxit fortitudine lumbos suos, et roboravit brachium suum.

  18. XVIII

    Gustavit, et vidit quia bona est negotiatio ejus ; non extinguetur in nocte lucerna ejus.

  19. XIX

    Manum suam misit ad fortia, et digiti ejus apprehenderunt fusum.

  20. XX

    Manum suam aperuit inopi, et palmas suas extendit ad pauperem.

  21. XXI

    Non timebit domui suæ a frigoribus nivis ; omnes enim domestici ejus vestiti sunt duplicibus.

  22. XXII

    Stragulatam vestem fecit sibi ; byssus et purpura indumentum ejus.

  23. XXIII

    Nobilis in portis vir ejus, quando sederit cum senatoribus terræ.

  24. XXIV

    Sindonem fecit, et vendidit, et cingulum tradidit Chananæo.

  25. XXV

    Fortitudo et decor indumentum ejus, et ridebit in die novissimo.

  26. XXVI

    Os suum aperuit sapientiæ, et lex clementiæ in lingua ejus.

  27. XXVII

    Consideravit semitas domus suæ, et panem otiosa non comedit.

  28. XXVIII

    Surrexerunt filii ejus, et beatissimam prædicaverunt ; vir ejus, et laudavit eam.

  29. XXIX

    Multæ filiæ congregaverunt divitias ; tu supergressa es universas.

  30. XXX

    Fallax gratia, et vana est pulchritudo : mulier timens Dominum, ipsa laudabitur.

  31. XXXI

    Date ei de fructu manuum suarum, et laudent eam in portis opera ejus.