Proverbiorum

Caput XXIX

  1. I

    Viro qui corripientem dura cervice contemnit, repentinus ei superveniet interitus, et eum sanitas non sequetur.

  2. II

    In multiplicatione justorum lætabitur vulgus ; cum impii sumpserint principatum, gemet populus.

  3. III

    Vir qui amat sapientiam lætificat patrem suum ; qui autem nutrit scorta perdet substantiam.

  4. IV

    Rex justus erigit terram ; vir avarus destruet eam.

  5. V

    Homo qui blandis fictisque sermonibus loquitur amico suo rete expandit gressibus ejus.

  6. VI

    Peccantem virum iniquum involvet laqueus, et justus laudabit atque gaudebit.

  7. VII

    Novit justus causam pauperum ; impius ignorat scientiam.

  8. VIII

    Homines pestilentes dissipant civitatem ; sapientes vero avertunt furorem.

  9. IX

    Vir sapiens si cum stulto contenderit, sive irascatur, sive rideat, non inveniet requiem.

  10. X

    Viri sanguinum oderunt simplicem ; justi autem quærunt animam ejus.

  11. XI

    Totum spiritum suum profert stultus ; sapiens differt, et reservat in posterum.

  12. XII

    Princeps qui libenter audit verba mendacii, omnes ministros habet impios.

  13. XIII

    Pauper et creditor obviaverunt sibi : utriusque illuminator est Dominus.

  14. XIV

    Rex qui judicat in veritate pauperes, thronus ejus in æternum firmabitur.

  15. XV

    Virga atque correptio tribuit sapientiam ; puer autem qui dimittitur voluntati suæ confundit matrem suam.

  16. XVI

    In multiplicatione impiorum multiplicabuntur scelera, et justi ruinas eorum videbunt.

  17. XVII

    Erudi filium tuum, et refrigerabit te, et dabit delicias animæ tuæ.

  18. XVIII

    Cum prophetia defecerit, dissipabitur populus ; qui vero custodit legem beatus est.

  19. XIX

    Servus verbis non potest erudiri, quia quod dicis intelligit, et respondere contemnit.

  20. XX

    Vidisti hominem velocem ad loquendum ? stultitia magis speranda est quam illius correptio.

  21. XXI

    Qui delicate a pueritia nutrit servum suum postea sentiet eum contumacem.

  22. XXII

    Vir iracundus provocat rixas, et qui ad indignandum facilis est erit ad peccandum proclivior.

  23. XXIII

    Superbum sequitur humilitas, et humilem spiritu suscipiet gloria.

  24. XXIV

    Qui cum fure participat odit animam suam ; adjurantem audit, et non indicat.

  25. XXV

    Qui timet hominem cito corruet ; qui sperat in Domino sublevabitur.

  26. XXVI

    Multi requirunt faciem principis, et judicium a Domino egreditur singulorum.

  27. XXVII

    Abominantur justi virum impium, et abominantur impii eos qui in recta sunt via. Verbum custodiens filius extra perditionem erit.