Numeri

Caput XXXVI

  1. I

    Accesserunt autem et principes familiarum Galaad filii Machir filii Manasse, de stirpe filiorum Joseph : locutique sunt Moysi coram principibus Israël, atque dixerunt :

  2. II

    Tibi domino nostro præcepit Dominus ut terram sorte divideres filiis Israël, et ut filiabus Salphaad fratris nostri dares possessionem debitam patri :

  3. III

    quas si alterius tribus homines uxores acceperint, sequetur possessio sua, et translata ad aliam tribum, de nostra hæreditate minuetur.

  4. IV

    Atque ita fiet, ut cum jubilæus, id est, quinquagesimus annus remissionis advenerit, confundatur sortium distributio, et aliorum possessio ad alios transeat.

  5. V

    Respondit Moyses filiis Israël, et Domino præcipiente ait : Recte tribus filiorum Joseph locuta est.

  6. VI

    Et hæc lex super filiabus Salphaad a Domino promulgata est : nubant quibus volunt, tantum ut suæ tribus hominibus :

  7. VII

    ne commisceatur possessio filiorum Israël de tribu in tribum. Omnes enim viri ducent uxores de tribu et cognatione sua :

  8. VIII

    et cunctæ feminæ de eadem tribu maritos accipient : ut hæreditas permaneat in familiis,

  9. IX

    nec sibi misceantur tribus, sed ita maneant

  10. X

    ut a Domino separatæ sunt. Feceruntque filiæ Salphaad ut fuerat imperatum :

  11. XI

    et nupserunt Maala, et Thersa, et Hegla, et Melcha, et Noa, filiis patrui sui

  12. XII

    de familia Manasse, qui fuit filius Joseph : et possessio, quæ illis fuerat attributa, mansit in tribu et familia patris earum.

  13. XIII

    Hæc sunt mandata atque judicia, quæ mandavit Dominus per manum Moysi ad filios Israël, in campestribus Moab supra Jordanem contra Jericho.