Numeri

Caput XXV

  1. I

    Morabatur autem eo tempore Israël in Settim, et fornicatus est populus cum filiabus Moab,

  2. II

    quæ vocaverunt eos ad sacrificia sua. At illi comederunt et adoraverunt deos earum.

  3. III

    Initiatusque est Israël Beelphegor : et iratus Dominus,

  4. IV

    ait ad Moysen : Tolle cunctos principes populi, et suspende eos contra solem in patibulis, ut avertatur furor meus ab Israël.

  5. V

    Dixitque Moyses ad judices Israël : Occidat unusquisque proximos suos, qui initiati sunt Beelphegor.

  6. VI

    Et ecce unus de filiis Israël intravit coram fratribus suis ad scortum Madianitidem, vidente Moyse, et omni turba filiorum Israël, qui flebant ante fores tabernaculi.

  7. VII

    Quod cum vidisset Phinees filius Eleazari filii Aaron sacerdotis, surrexit de medio multitudinis, et arrepto pugione,

  8. VIII

    ingressus est post virum Israëlitem in lupanar, et perfodit ambos simul, virum scilicet et mulierem in locis genitalibus. Cessavitque plaga a filiis Israël :

  9. IX

    et occisi sunt viginti quatuor millia hominum.

  10. X

    Dixitque Dominus ad Moysen :

  11. XI

    Phinees filius Eleazari filii Aaron sacerdotis avertit iram meam a filiis Israël : quia zelo meo commotus est contra eos, ut non ipse delerem filios Israël in zelo meo.

  12. XII

    Idcirco loquere ad eum : Ecce do ei pacem fœderis mei,

  13. XIII

    et erit tam ipsi quam semini ejus pactum sacerdotii sempiternum : quia zelatus est pro Deo suo, et expiavit scelus filiorum Israël.

  14. XIV

    Erat autem nomen viri Israëlitæ, qui occisus est cum Madianitide, Zambri filius Salu, dux de cognatione et tribu Simeonis.

  15. XV

    Porro mulier Madianitis, quæ pariter interfecta est, vocabatur Cozbi filia Sur principis nobilissimi Madianitarum.

  16. XVI

    Locutusque est Dominus ad Moysen, dicens :

  17. XVII

    Hostes vos sentiant Madianitæ, et percutite eos :

  18. XVIII

    quia et ipsi hostiliter egerunt contra vos, et decepere insidiis per idolum Phogor, et Cozbi filiam ducis Madian sororem suam, quæ percussa est in die plagæ pro sacrilegio Phogor.