Isaiæ

Caput XII

  1. I

    Et dices in die illa : Confitebor tibi, Domine, quoniam iratus es mihi ; conversus est furor tuus, et consolatus es me.

  2. II

    Ecce Deus salvator meus ; fiducialiter agam, et non timebo : quia fortitudo mea et laus mea Dominus, et factus est mihi in salutem.

  3. III

    Haurietis aquas in gaudio de fontibus salvatoris.

  4. IV

    Et dicetis in die illa : Confitemini Domino et invocate nomen ejus ; notas facite in populis adinventiones ejus ; mementote quoniam excelsum est nomen ejus.

  5. V

    Cantate Domino, quoniam magnifice fecit ; annuntiate hoc in universa terra.

  6. VI

    Exsulta et lauda, habitatio Sion, quia magnus in medio tui Sanctus Israël.