Genesis

Caput V

  1. I

    Hic est liber generationis Adam. In die qua creavit Deus hominem, ad similitudinem Dei fecit illum.

  2. II

    Masculum et feminam creavit eos, et benedixit illis : et vocavit nomen eorum Adam, in die quo creati sunt.

  3. III

    Vixit autem Adam centum triginta annis : et genuit ad imaginem et similitudinem suam, vocavitque nomen ejus Seth.

  4. IV

    Et facti sunt dies Adam, postquam genuit Seth, octingenti anni : genuitque filios et filias.

  5. V

    Et factum est omne tempus quod vixit Adam, anni nongenti triginta, et mortuus est.

  6. VI

    Vixit quoque Seth centum quinque annis, et genuit Enos.

  7. VII

    Vixitque Seth, postquam genuit Enos, octingentis septem annis, genuitque filios et filias.

  8. VIII

    Et facti sunt omnes dies Seth nongentorum duodecim annorum, et mortuus est.

  9. IX

    Vixit vero Enos nonaginta annis, et genuit Cainan.

  10. X

    Post cujus ortum vixit octingentis quindecim annis, et genuit filios et filias.

  11. XI

    Factique sunt omnes dies Enos nongenti quinque anni, et mortuus est.

  12. XII

    Vixit quoque Cainan septuaginta annis, et genuit Malaleel.

  13. XIII

    Et vixit Cainan, postquam genuit Malaleel, octingentis quadraginta annis, genuitque filios et filias.

  14. XIV

    Et facti sunt omnes dies Cainan nongenti decem anni, et mortuus est.

  15. XV

    Vixit autem Malaleel sexaginta quinque annis, et genuit Jared.

  16. XVI

    Et vixit Malaleel, postquam genuit Jared, octingentis triginta annis, et genuit filios et filias.

  17. XVII

    Et facti sunt omnes dies Malaleel octingenti nonaginta quinque anni, et mortuus est.

  18. XVIII

    Vixitque Jared centum sexaginta duobus annis, et genuit Henoch.

  19. XIX

    Et vixit Jared, postquam genuit Henoch, octingentis annis, et genuit filios et filias.

  20. XX

    Et facti sunt omnes dies Jared nongenti sexaginta duo anni, et mortuus est.

  21. XXI

    Porro Henoch vixit sexaginta quinque annis, et genuit Mathusalam.

  22. XXII

    Et ambulavit Henoch cum Deo : et vixit, postquam genuit Mathusalam, trecentis annis, et genuit filios et filias.

  23. XXIII

    Et facti sunt omnes dies Henoch trecenti sexaginta quinque anni.

  24. XXIV

    Ambulavitque cum Deo, et non apparuit : quia tulit eum Deus.

  25. XXV

    Vixit quoque Mathusala centum octoginta septem annis, et genuit Lamech.

  26. XXVI

    Et vixit Mathusala, postquam genuit Lamech, septingentis octoginta duobus annis, et genuit filios et filias.

  27. XXVII

    Et facti sunt omnes dies Mathusala nongenti sexaginta novem anni, et mortuus est.

  28. XXVIII

    Vixit autem Lamech centum octoginta duobus annis, et genuit filium :

  29. XXIX

    vocavitque nomen ejus Noë, dicens : Iste consolabitur nos ab operibus et laboribus manuum nostrarum in terra, cui maledixit Dominus.

  30. XXX

    Vixitque Lamech, postquam genuit Noë, quingentis nonaginta quinque annis, et genuit filios et filias.

  31. XXXI

    Et facti sunt omnes dies Lamech septingenti septuaginta septem anni, et mortuus est. Noë vero cum quingentorum esset annorum, genuit Sem, Cham et Japheth.