Exodus

Caput XL

  1. I

    Locutusque est Dominus ad Moysen, dicens :

  2. II

    Mense primo, prima die mensis, eriges tabernaculum testimonii,

  3. III

    et pones in eo arcam, dimittesque ante illam velum :

  4. IV

    et illata mensa, pones super eam quæ rite præcepta sunt. Candelabrum stabit cum lucernis suis,

  5. V

    et altare aureum, in quo adoletur incensum, coram arca testimonii. Tentorium in introitu tabernaculi pones,

  6. VI

    et ante illud altare holocausti :

  7. VII

    labrum inter altare et tabernaculum, quod implebis aqua.

  8. VIII

    Circumdabisque atrium tentoriis, et ingressum ejus.

  9. IX

    Et assumpto unctionis oleo unges tabernaculum cum vasis suis, ut sanctificentur :

  10. X

    altare holocausti et omnia vasa ejus,

  11. XI

    labrum cum basi sua : omnia unctionis oleo consecrabis, ut sint Sancta sanctorum.

  12. XII

    Applicabisque Aaron et filios ejus ad fores tabernaculi testimonii, et lotos aqua

  13. XIII

    indues sanctis vestibus, ut ministrent mihi, et unctio eorum in sacerdotium sempiternum proficiat.

  14. XIV

    Fecitque Moyses omnia quæ præceperat Dominus.

  15. XV

    Igitur mense primo anni secundi, prima die mensis, collocatum est tabernaculum.

  16. XVI

    Erexitque Moyses illud, et posuit tabulas ac bases et vectes, statuitque columnas,

  17. XVII

    et expandit tectum super tabernaculum, imposito desuper operimento, sicut Dominus imperaverat.

  18. XVIII

    Posuit et testimonium in arca, subditis infra vectibus, et oraculum desuper.

  19. XIX

    Cumque intulisset arcam in tabernaculum, appendit ante eam velum ut expleret Domini jussionem.

  20. XX

    Posuit et mensam in tabernaculo testimonii ad plagam septentrionalem extra velum,

  21. XXI

    ordinatis coram propositionis panibus, sicut præceperat Dominus Moysi.

  22. XXII

    Posuit et candelabrum in tabernaculo testimonii e regione mensæ in parte australi,

  23. XXIII

    locatis per ordinem lucernis, juxta præceptum Domini.

  24. XXIV

    Posuit et altare aureum sub tecto testimonii contra velum,

  25. XXV

    et adolevit super eo incensum aromatum, sicut jusserat Dominus Moysi.

  26. XXVI

    Posuit et tentorium in introitu tabernaculi testimonii,

  27. XXVII

    et altare holocausti in vestibulo testimonii, offerens in eo holocaustum, et sacrificia, ut Dominus imperaverat.

  28. XXVIII

    Labrum quoque statuit inter tabernaculum testimonii et altare, implens illud aqua.

  29. XXIX

    Laveruntque Moyses et Aaron ac filii ejus manus suas et pedes,

  30. XXX

    cum ingrederentur tectum fœderis, et accederent ad altare, sicut præceperat Dominus Moysi.

  31. XXXI

    Erexit et atrium per gyrum tabernaculi et altaris, ducto in introitu ejus tentorio. Postquam omnia perfecta sunt,

  32. XXXII

    operuit nubes tabernaculum testimonii, et gloria Domini implevit illud.

  33. XXXIII

    Nec poterat Moyses ingredi tectum fœderis, nube operiente omnia, et majestate Domini coruscante, quia cuncta nubes operuerat.

  34. XXXIV

    Siquando nubes tabernaculum deserebat, proficiscebantur filii Israël per turmas suas :

  35. XXXV

    si pendebat desuper, manebant in eodem loco.

  36. XXXVI

    Nubes quippe Domini incubabat per diem tabernaculo, et ignis in nocte, videntibus cunctis populis Israël per cunctas mansiones suas.