ad Colossenses

Caput III

  1. I

    Igitur, si consurrexistis cum Christo : quæ sursum sunt quærite, ubi Christus est in dextera Dei sedens :

  2. II

    quæ sursum sunt sapite, non quæ super terram.

  3. III

    Mortui enim estis, et vita vestra est abscondita cum Christo in Deo.

  4. IV

    Cum Christus apparuerit, vita vestra : tunc et vos apparebitis cum ipso in gloria.

  5. V

    Mortificate ergo membra vestra, quæ sunt super terram : fornicationem, immunditiam, libidinem, concupiscentiam malam, et avaritiam, quæ est simulacrorum servitus :

  6. VI

    propter quæ venit ira Dei super filios incredulitatis :

  7. VII

    in quibus et vos ambulastis aliquando, cum viveretis in illis.

  8. VIII

    Nunc autem deponite et vos omnia : iram, indignationem, malitiam, blasphemiam, turpem sermonem de ore vestro.

  9. IX

    Nolite mentiri invicem, expoliantes vos veterem hominem cum actibus suis,

  10. X

    et induentes novum eum, qui renovatur in agnitionem secundum imaginem ejus qui creavit illum :

  11. XI

    ubi non est gentilis et Judæus, circumcisio et præputium, Barbarus et Scytha, servus et liber : sed omnia, et in omnibus Christus.

  12. XII

    Induite vos ergo, sicut electi Dei, sancti, et dilecti, viscera misericordiæ, benignitatem, humilitatem, modestiam, patientiam :

  13. XIII

    supportantes invicem, et donantes vobismetipsis si quis adversus aliquem habet querelam : sicut et Dominus donavit vobis, ita et vos.

  14. XIV

    Super omnia autem hæc, caritatem habete, quod est vinculum perfectionis :

  15. XV

    et pax Christi exsultet in cordibus vestris, in qua et vocati estis in uno corpore : et grati estote.

  16. XVI

    Verbum Christi habitet in vobis abundanter, in omni sapientia, docentes, et commonentes vosmetipsos, psalmis, hymnis, et canticis spiritualibus, in gratia cantantes in cordibus vestris Deo.

  17. XVII

    Omne, quodcumque facitis in verbo aut in opere, omnia in nomine Domini Jesu Christi, gratias agentes Deo et Patri per ipsum.

  18. XVIII

    Mulieres, subditæ estote viris, sicut oportet, in Domino.

  19. XIX

    Viri, diligite uxores vestras, et nolite amari esse ad illas.

  20. XX

    Filii, obedite parentibus per omnia : hoc enim placitum est in Domino.

  21. XXI

    Patres, nolite ad indignationem provocare filios vestros, ut non pusillo animo fiant.

  22. XXII

    Servi, obedite per omnia dominis carnalibus, non ad oculum servientes, quasi hominibus placentes, sed in simplicitate cordis, timentes Deum.

  23. XXIII

    Quodcumque facitis, ex animo operamini sicut Domino, et non hominibus :

  24. XXIV

    scientes quod a Domino accipietis retributionem hæreditatis. Domino Christo servite.

  25. XXV

    Qui enim injuriam facit, recipiet id quod inique gessit : et non est personarum acceptio apud Deum.