ad Colossenses

Caput II

  1. I

    Volo enim vos scire qualem sollicitudinem habeam pro vobis, et pro iis qui sunt Laodiciæ, et quicumque non viderunt faciem meam in carne :

  2. II

    ut consolentur corda ipsorum, instructi in caritate, et in omnes divitias plenitudinis intellectus, in agnitionem mysterii Dei Patris et Christi Jesu :

  3. III

    in quo sunt omnes thesauri sapientiæ et scientiæ absconditi.

  4. IV

    Hoc autem dico, ut nemo vos decipiat in sublimitate sermonum.

  5. V

    Nam etsi corpore absens sum, sed spiritu vobiscum sum : gaudens, et videns ordinem vestrum, et firmamentum ejus, quæ in Christo est, fidei vestræ.

  6. VI

    Sicut ergo accepistis Jesum Christum Dominum, in ipso ambulate,

  7. VII

    radicati, et superædificati in ipso, et confirmati fide, sicut et didicistis, abundantes in illo in gratiarum actione.

  8. VIII

    Videte ne quis vos decipiat per philosophiam, et inanem fallaciam secundum traditionem hominum, secundum elementa mundi, et non secundum Christum :

  9. IX

    quia in ipso inhabitat omnis plenitudo divinitatis corporaliter :

  10. X

    et estis in illo repleti, qui est caput omnis principatus et potestatis :

  11. XI

    in quo et circumcisi estis circumcisione non manu facta in expoliatione corporis carnis, sed in circumcisione Christi :

  12. XII

    consepulti ei in baptismo, in quo et resurrexistis per fidem operationis Dei, qui suscitavit illum a mortuis.

  13. XIII

    Et vos cum mortui essetis in delictis, et præputio carnis vestræ, convivificavit cum illo, donans vobis omnia delicta :

  14. XIV

    delens quod adversus nos erat chirographum decreti, quod erat contrarium nobis, et ipsum tulit de medio, affigens illud cruci :

  15. XV

    et expolians principatus, et potestates traduxit confidenter, palam triumphans illos in semetipso.

  16. XVI

    Nemo ergo vos judicet in cibo, aut in potu, aut in parte diei festi, aut neomeniæ, aut sabbatorum :

  17. XVII

    quæ sunt umbra futurorum : corpus autem Christi.

  18. XVIII

    Nemo vos seducat, volens in humilitate, et religione angelorum, quæ non vidit ambulans, frustra inflatus sensu carnis suæ,

  19. XIX

    et non tenens caput, ex quo totum corpus per nexus, et conjunctiones subministratum, et constructum crescit in augmentum Dei.

  20. XX

    Si ergo mortui estis cum Christo ab elementis hujus mundi : quid adhuc tamquam viventes in mundo decernitis ?

  21. XXI

    Ne tetigeritis, neque gustaveritis, neque contrectaveritis :

  22. XXII

    quæ sunt omnia in interitum ipso usu, secundum præcepta et doctrinas hominum :

  23. XXIII

    quæ sunt rationem quidem habentia sapientiæ in superstitione, et humilitate, et non ad parcendum corpori, non in honore aliquo ad saturitatem carnis.