Canticum Canticorum

Caput IV

  1. I

    Quam pulchra es, amica mea ! quam pulchra es ! Oculi tui columbarum, absque eo quod intrinsecus latet. Capilli tui sicut greges caprarum quæ ascenderunt de monte Galaad.

  2. II

    Dentes tui sicut greges tonsarum quæ ascenderunt de lavacro ; omnes gemellis fœtibus, et sterilis non est inter eas.

  3. III

    Sicut vitta coccinea labia tua, et eloquium tuum dulce. Sicut fragmen mali punici, ita genæ tuæ, absque eo quod intrinsecus latet.

  4. IV

    Sicut turris David collum tuum, quæ ædificata est cum propugnaculis ; mille clypei pendent ex ea, omnis armatura fortium.

  5. V

    Duo ubera tua sicut duo hinnuli, capreæ gemelli, qui pascuntur in liliis.

  6. VI

    Donec aspiret dies, et inclinentur umbræ, vadam ad montem myrrhæ, et ad collem thuris.

  7. VII

    Tota pulchra es, amica mea, et macula non est in te.

  8. VIII

    Veni de Libano, sponsa mea : veni de Libano, veni, coronaberis : de capite Amana, de vertice Sanir et Hermon, de cubilibus leonum, de montibus pardorum.

  9. IX

    Vulnerasti cor meum, soror mea, sponsa ; vulnerasti cor meum in uno oculorum tuorum, et in uno crine colli tui.

  10. X

    Quam pulchræ sunt mammæ tuæ, soror mea sponsa ! pulchriora sunt ubera tua vino, et odor unguentorum tuorum super omnia aromata.

  11. XI

    Favus distillans labia tua, sponsa ; mel et lac sub lingua tua : et odor vestimentorum tuorum sicut odor thuris.

  12. XII

    Hortus conclusus soror mea, sponsa, hortus conclusus, fons signatus.

  13. XIII

    Emissiones tuæ paradisus malorum punicorum, cum pomorum fructibus, cypri cum nardo.

  14. XIV

    Nardus et crocus, fistula et cinnamomum, cum universis lignis Libani ; myrrha et aloë, cum omnibus primis unguentis.

  15. XV

    Fons hortorum, puteus aquarum viventium, quæ fluunt impetu de Libano.

  16. XVI

    Surge, aquilo, et veni, auster : perfla hortum meum, et fluant aromata illius.