I ad Timotheum

Caput IV

  1. I

    Spiritus autem manifeste dicit, quia in novissimis temporibus discedent quidam a fide, attendentes spiritibus erroris, et doctrinis dæmoniorum,

  2. II

    in hypocrisi loquentium mendacium, et cauteriatam habentium suam conscientiam,

  3. III

    prohibentium nubere, abstinere a cibis, quod Deus creavit ad percipiendum cum gratiarum actione fidelibus, et iis qui cognoverunt veritatem.

  4. IV

    Quia omnis creatura Dei bona est, et nihil rejiciendum quod cum gratiarum actione percipitur :

  5. V

    sanctificatur enim per verbum Dei, et orationem.

  6. VI

    Hæc proponens fratribus, bonus eris minister Christi Jesu enutritus verbis fidei, et bonæ doctrinæ, quam assecutus es.

  7. VII

    Ineptas autem, et aniles fabulas devita : exerce autem teipsum ad pietatem.

  8. VIII

    Nam corporalis exercitatio, ad modicum utilis est : pietas autem ad omnia utilis est, promissionem habens vitæ, quæ nunc est, et futuræ.

  9. IX

    Fidelis sermo, et omni acceptione dignus.

  10. X

    In hoc enim laboramus, et maledicimur, quia speramus in Deum vivum, qui est Salvator omnium hominum, maxime fidelium.

  11. XI

    Præcipe hæc, et doce.

  12. XII

    Nemo adolescentiam tuam contemnat : sed exemplum esto fidelium in verbo, in conversatione, in caritate, in fide, in castitate.

  13. XIII

    Dum venio, attende lectioni, exhortationi, et doctrinæ.

  14. XIV

    Noli negligere gratiam, quæ in te est, quæ data est tibi per prophetiam, cum impositione manuum presbyterii.

  15. XV

    Hæc meditare, in his esto : ut profectus tuus manifestus sit omnibus.

  16. XVI

    Attende tibi, et doctrinæ : insta in illis. Hoc enim faciens, et teipsum salvum facies, et eos qui te audiunt.