Thobis

Caput VII

  1. I

    Ingressi sunt autem ad Raguelem, et suscepit eos Raguel cum gaudio.

  2. II

    Intuensque Tobiam Raguel, dixit Annæ uxori suæ : Quam similis est juvenis iste consobrino meo !

  3. III

    Et cum hæc dixisset, ait : Unde estis juvenes fratres nostri ? At illi dixerunt : Ex tribu Nephthali sumus, ex captivitate Ninive.

  4. IV

    Dixitque illis Raguel : Nostis Tobiam fratrem meum ? Qui dixerunt : Novimus.

  5. V

    Cumque multa bona loqueretur de eo, dixit angelus ad Raguelem : Tobias, de quo interrogas, pater istius est.

  6. VI

    Et misit se Raguel, et cum lacrimis osculatus est eum, et plorans supra collum ejus

  7. VII

    dixit : Benedictio sit tibi, fili mi, quia boni et optimi viri filius es.

  8. VIII

    Et Anna uxor ejus, et Sara ipsorum filia, lacrimatæ sunt.

  9. IX

    Postquam autem locuti sunt, præcepit Raguel occidi arietem, et parari convivium. Cumque hortaretur eos discumbere ad prandium,

  10. X

    Tobias dixit : Hic ego hodie non manducabo neque bibam, nisi prius petitionem meam confirmes, et promittas mihi dare Saram filiam tuam.

  11. XI

    Quo audito verbo Raguel expavit, sciens quid evenerit illis septem viris qui ingressi sunt ad eam : et timere cœpit ne forte et huic similiter contingeret. Et cum nutaret, et non daret petenti ullum responsum,

  12. XII

    dixit ei angelus : Noli timere dare eam isti, quoniam huic timenti Deum debetur conjux filia tua : propterea alius non potuit habere illam.

  13. XIII

    Tunc dixit Raguel : Non dubito quod Deus preces et lacrimas meas in conspectu suo admiserit.

  14. XIV

    Et credo quoniam ideo fecit vos venire ad me, ut ista conjungeretur cognationi suæ secundum legem Moysi : et nunc noli dubium gerere quod tibi eam tradam.

  15. XV

    Et apprehendens dexteram filiæ suæ, dexteræ Tobiæ tradidit, dicens : Deus Abraham, et Deus Isaac, et Deus Jacob vobiscum sit, et ipse conjungat vos, impleatque benedictionem suam in vobis.

  16. XVI

    Et accepta carta, fecerunt conscriptionem conjugii.

  17. XVII

    Et post hæc epulati sunt, benedicentes Deum.

  18. XVIII

    Vocavitque Raguel ad se Annam uxorem suam, et præcepit ei ut præpararet alterum cubiculum.

  19. XIX

    Et introduxit illuc Saram filiam suam, et lacrimata est.

  20. XX

    Dixitque ei : Forti animo esto, filia mea : Dominus cæli det tibi gaudium pro tædio quod perpessa es.