Psalmorum

Psalmus VI

  1. I

    In finem, in carminibus. Psalmus David. Pro octava.

  2. II

    Domine, ne in furore tuo arguas me, neque in ira tua corripias me.

  3. III

    Miserere mei, Domine, quoniam infirmus sum ; sana me, Domine, quoniam conturbata sunt ossa mea.

  4. IV

    Et anima mea turbata est valde ; sed tu, Domine, usquequo ?

  5. V

    Convertere, Domine, et eripe animam meam ; salvum me fac propter misericordiam tuam.

  6. VI

    Quoniam non est in morte qui memor sit tui ; in inferno autem quis confitebitur tibi ?

  7. VII

    Laboravi in gemitu meo ; lavabo per singulas noctes lectum meum : lacrimis meis stratum meum rigabo.

  8. VIII

    Turbatus est a furore oculus meus ; inveteravi inter omnes inimicos meos.

  9. IX

    Discedite a me omnes qui operamini iniquitatem, quoniam exaudivit Dominus vocem fletus mei.

  10. X

    Exaudivit Dominus deprecationem meam ; Dominus orationem meam suscepit.

  11. XI

    Erubescant, et conturbentur vehementer, omnes inimici mei ; convertantur, et erubescant valde velociter.