Psalmorum

Psalmus XLVI

  1. I

    In finem, pro filiis Core. Psalmus.

  2. II

    Omnes gentes, plaudite manibus ; jubilate Deo in voce exsultationis :

  3. III

    quoniam Dominus excelsus, terribilis, rex magnus super omnem terram.

  4. IV

    Subjecit populos nobis, et gentes sub pedibus nostris.

  5. V

    Elegit nobis hæreditatem suam ; speciem Jacob quam dilexit.

  6. VI

    Ascendit Deus in jubilo, et Dominus in voce tubæ.

  7. VII

    Psallite Deo nostro, psallite ; psallite regi nostro, psallite :

  8. VIII

    quoniam rex omnis terræ Deus, psallite sapienter.

  9. IX

    Regnabit Deus super gentes ; Deus sedet super sedem sanctam suam.

  10. X

    Principes populorum congregati sunt cum Deo Abraham, quoniam dii fortes terræ vehementer elevati sunt.