Psalmorum

Psalmus XLIII

  1. I

    In finem. Filiis Core ad intellectum.

  2. II

    Deus, auribus nostris audivimus, patres nostri annuntiaverunt nobis, opus quod operatus es in diebus eorum, et in diebus antiquis.

  3. III

    Manus tua gentes disperdidit, et plantasti eos ; afflixisti populos, et expulisti eos.

  4. IV

    Nec enim in gladio suo possederunt terram, et brachium eorum non salvavit eos : sed dextera tua et brachium tuum, et illuminatio vultus tui, quoniam complacuisti in eis.

  5. V

    Tu es ipse rex meus et Deus meus, qui mandas salutes Jacob.

  6. VI

    In te inimicos nostros ventilabimus cornu, et in nomine tuo spernemus insurgentes in nobis.

  7. VII

    Non enim in arcu meo sperabo, et gladius meus non salvabit me :

  8. VIII

    salvasti enim nos de affligentibus nos, et odientes nos confudisti.

  9. IX

    In Deo laudabimur tota die, et in nomine tuo confitebimur in sæculum.

  10. X

    Nunc autem repulisti et confudisti nos, et non egredieris, Deus, in virtutibus nostris.

  11. XI

    Avertisti nos retrorsum post inimicos nostros, et qui oderunt nos diripiebant sibi.

  12. XII

    Dedisti nos tamquam oves escarum, et in gentibus dispersisti nos.

  13. XIII

    Vendidisti populum tuum sine pretio, et non fuit multitudo in commutationibus eorum.

  14. XIV

    Posuisti nos opprobrium vicinis nostris ; subsannationem et derisum his qui sunt in circuitu nostro.

  15. XV

    Posuisti nos in similitudinem gentibus ; commotionem capitis in populis.

  16. XVI

    Tota die verecundia mea contra me est, et confusio faciei meæ cooperuit me :

  17. XVII

    a voce exprobrantis et obloquentis, a facie inimici et persequentis.

  18. XVIII

    Hæc omnia venerunt super nos ; nec obliti sumus te, et inique non egimus in testamento tuo.

  19. XIX

    Et non recessit retro cor nostrum ; et declinasti semitas nostras a via tua :

  20. XX

    quoniam humiliasti nos in loco afflictionis, et cooperuit nos umbra mortis.

  21. XXI

    Si obliti sumus nomen Dei nostri, et si expandimus manus nostras ad deum alienum,

  22. XXII

    nonne Deus requiret ista ? ipse enim novit abscondita cordis. Quoniam propter te mortificamur tota die ; æstimati sumus sicut oves occisionis.

  23. XXIII

    Exsurge ; quare obdormis, Domine ? exsurge, et ne repellas in finem.

  24. XXIV

    Quare faciem tuam avertis ? oblivisceris inopiæ nostræ et tribulationis nostræ ?

  25. XXV

    Quoniam humiliata est in pulvere anima nostra ; conglutinatus est in terra venter noster.

  26. XXVI

    Exsurge, Domine, adjuva nos, et redime nos propter nomen tuum.