Psalmorum

Psalmus XXVIII

  1. I

    Psalmus David, in consummatione tabernaculi. Afferte Domino, filii Dei, afferte Domino filios arietum.

  2. II

    Afferte Domino gloriam et honorem ; afferte Domino gloriam nomini ejus ; adorate Dominum in atrio sancto ejus.

  3. III

    Vox Domini super aquas ; Deus majestatis intonuit : Dominus super aquas multas.

  4. IV

    Vox Domini in virtute ; vox Domini in magnificentia.

  5. V

    Vox Domini confringentis cedros, et confringet Dominus cedros Libani :

  6. VI

    et comminuet eas, tamquam vitulum Libani, et dilectus quemadmodum filius unicornium.

  7. VII

    Vox Domini intercidentis flammam ignis ;

  8. VIII

    vox Domini concutientis desertum : et commovebit Dominus desertum Cades.

  9. IX

    Vox Domini præparantis cervos : et revelabit condensa, et in templo ejus omnes dicent gloriam.

  10. X

    Dominus diluvium inhabitare facit, et sedebit Dominus rex in æternum.

  11. XI

    Dominus virtutem populo suo dabit ; Dominus benedicet populo suo in pace.