Psalmorum

Psalmus CXXXVII

  1. I

    Ipsi David. Confitebor tibi, Domine, in toto corde meo, quoniam audisti verba oris mei. In conspectu angelorum psallam tibi ;

  2. II

    adorabo ad templum sanctum tuum, et confitebor nomini tuo : super misericordia tua et veritate tua ; quoniam magnificasti super omne, nomen sanctum tuum.

  3. III

    In quacumque die invocavero te, exaudi me ; multiplicabis in anima mea virtutem.

  4. IV

    Confiteantur tibi, Domine, omnes reges terræ, quia audierunt omnia verba oris tui.

  5. V

    Et cantent in viis Domini, quoniam magna est gloria Domini ;

  6. VI

    quoniam excelsus Dominus, et humilia respicit, et alta a longe cognoscit.

  7. VII

    Si ambulavero in medio tribulationis, vivificabis me ; et super iram inimicorum meorum extendisti manum tuam, et salvum me fecit dextera tua.

  8. VIII

    Dominus retribuet pro me. Domine, misericordia tua in sæculum ; opera manuum tuarum ne despicias.