Psalmorum

Psalmus CXXXI

  1. I

    Canticum graduum. Memento, Domine, David, et omnis mansuetudinis ejus :

  2. II

    sicut juravit Domino ; votum vovit Deo Jacob :

  3. III

    Si introiero in tabernaculum domus meæ ; si ascendero in lectum strati mei ;

  4. IV

    si dedero somnum oculis meis, et palpebris meis dormitationem,

  5. V

    et requiem temporibus meis, donec inveniam locum Domino, tabernaculum Deo Jacob.

  6. VI

    Ecce audivimus eam in Ephrata ; invenimus eam in campis silvæ.

  7. VII

    Introibimus in tabernaculum ejus ; adorabimus in loco ubi steterunt pedes ejus.

  8. VIII

    Surge, Domine, in requiem tuam, tu et arca sanctificationis tuæ.

  9. IX

    Sacerdotes tui induantur justitiam, et sancti tui exsultent.

  10. X

    Propter David servum tuum non avertas faciem christi tui.

  11. XI

    Juravit Dominus David veritatem, et non frustrabitur eam : De fructu ventris tui ponam super sedem tuam.

  12. XII

    Si custodierint filii tui testamentum meum, et testimonia mea hæc quæ docebo eos, et filii eorum usque in sæculum sedebunt super sedem tuam.

  13. XIII

    Quoniam elegit Dominus Sion : elegit eam in habitationem sibi.

  14. XIV

    Hæc requies mea in sæculum sæculi ; hic habitabo, quoniam elegi eam.

  15. XV

    Viduam ejus benedicens benedicam ; pauperes ejus saturabo panibus.

  16. XVI

    Sacerdotes ejus induam salutari, et sancti ejus exsultatione exsultabunt.

  17. XVII

    Illuc producam cornu David ; paravi lucernam christo meo.

  18. XVIII

    Inimicos ejus induam confusione ; super ipsum autem efflorebit sanctificatio mea.